البنوك.. وتكنولوجيا (أم ريالين)!

يستغرب الشخص لما يشوف البنوك عندنا ما هي قادرة تنافس في مجال تقديم خدمات تكنولوجية تقنع الناس وتسكت أمثالي اللي يدورون أي شي عشان يشبعون فيه لطم وتولول، تطورت كل البنوك في العالم في تقديم خدمات للعميل بشكل مريح وخالي من الأخطاء، إلا الكثير من بنوكنا اللي ما زالت مكانك راوح وللحين مو قادرة تكسب ثقة العملاء، وخدماتها التكنولوجية تعل الكبد وتجيب القولون والقرحة، فرحنا لما عرفنا إن الخدمات البنكية الهاتفية راح تشتغل وأول ما اشتغلت دعينا ربنا إننا نرجع على النظام الأول، فيه بعض البنوك ما يعتمد لك خدمات التسديد بواسطة الهاتف إلا بعد ما تراجع الفرع وتوقف سرى وبعدين تقابل موظف طفشان ونفسه بخشمه، تجلس بجنبه على الطاولة وإنت تتوقع كل شوي يعطيك بقس وألا كف وتدعي بقلبك يا رب متى أخلص وأهرب بجلدي من ها الموظف اللي كنه متخرج من نادي ملاكمة مو موظف بنك، يرمي لك الكي بورد ويقول لك من غير نفس: دخل رقم سري، إنت تخاف تسأل حق إيش؟ وتدخل رقم سري، لأنهم ما يشرحون لك إلا بعد كم أسبوع من المراجعات، بعد ما تحاول عشرين مرة تسدد بجوالك وبعد ما تمل تروح للفرع مرة ثانية عشان يشرحون لك مرة ثانية، هذا غير آلاف المرات اللي تسدد فيها بواسطة الفيزا وتنخصم عليك مرتين، وقابلني إن رجعت 
فلوسك قبل سنة!