باب العتب مقفول

الحب يبقى والظنون تزول
لا ماتت الله لا يحللها
حبيبتي ولسانها المعسول
أجمل بيوت الشعر واجزلها
بين الخيال ولذة المعقول
اقبل على الدنيا ولا اوصلها
في عينها مسراي خمس فصول
في نصها مدري عن اولها
لو اسهر بكيفي يدور الحول
ما ملت عيوني مقابلها
الليل يقصر والنهار يطول
ونوم النهار اكبر مشاكلها
تسهر ومن دون النجوم تحول
نجمه وسقف القلب.. منزلها
حزة مطر واحساسها هملول
تمطر على روحي وتغسلها
باب العتب من يمها مقفول
ولا كل زلاتي تزعلها
وجه زعلها بالرضا مغسول
وحتى الزعل لا زاد جملها
قلبي عن اللي غيرها مشغول
وفي عالمه عن عالمه.. يلهى
في كل حرف تطلعه مدلول
وفي كل نظرة شيء مشغلها
قلبي اذا غابت عنه.. معلول
واذا اقبلت يمه يفز إلها
اشوف فيها الواقع المامول
وجد الزمن شلته بمحملها!
مستقبلي من دونها مجهول
ومشاعري من دونها ولهى
حبي لها ما عاد فيه حلول
لو تنتقده الارض بأكملها