الحرامي مبسوط

ما ودنا نهول الأمور زي الصحفيين، لأن تهويل الأمور عادة ما هيب زينة لكن بعض السوالف ما تنحل بدون تهويل، الحين لو درعم عليك حرامي ببيتك، لا تحاول تسوي نفسك بطل قدام حرمتك، لأنك ممكن تتمرط ثمن تطيح من عين المدام بعدين حلها على بال ما تستعيد مكانك وقيمتك عند ام العيال، الحرامي يدخل على كيفه بيتك ويحط رجله والسرابيت اخوياه ينتظرونه في سيارة مسروقة قدام بيتك، ويا ويلك ويا سواد ليلك لو حاولت تعور الاخ الحرامي؛ لأنك ممكن تنسجن ويضيع مستقبلك، وممكن تروح تحويشة عمرك مصاريف محامي عشان يفكك من السجن لانك عورت الاخ الحرامي.
صراحة طريقة التعامل مع حرامية الاسطوانات واجهزة الكمبيوتر وحرامية البيوت عموما طريقة ما هي جايبة خبرها والحرامية ماخذين راحتهم ع الاخر، الحين لو كنت تملك مسدس مرخص في البيت ممكن يمر الحرامي قدام خشمك ولو حاولت تطلق عليه لا تلوم الا نفسك، يعني لازم اوقف الحرامي واشوف وش ناوي يسرق؟ اذا كان ناوي يسرق اسطوانة اضربه كف، وان كان ناوي يسرق تلفزيون اعطيه بقس، وان كان ناوي يسرق ذهب الحرمة قل لها تغطي وروحي اجلسي بالمقلط لين الاخ الحرامي يخلص شغله، انتبه ثم انتبه تطلق النار على حرامي تراك رحت فيها!