مطيورين!

اليوم جايتني حالة مدري شلون قايله، لي نفس اروح اسلم على سكان حارتنا واعزمهم، مخي مليان وناسة، دايم لا تونست ودي اسوي عزيمة، ما تصدق على الله تجيك هالحالة الونايسية اللي مخك يهدا فيه مطامر الافكار، ونفسك يروح الجبل اللي فوقها، تجيك هالحالة في هالزمن اللي انت دايم مضغوط فيه ساعات معدودة كل شهر والا شهرين، دايم مشغولين بلا شغل، ماسكين خط وداعسين على البنزين لين العداد حق السرعة شوي وينكسر، واللي يمشي بسرعة مثلنا راح يبنط بجدار لو تعرض طريقة اي شي بسيط، ودك فيه جمعية خيرية تحط موظفين بس شغلتهم انهم يمسكون لوحات مكتوب عليها (هدوا هدوا سرعتكم يالسعوديين وراكم داعسين على غير سنع)، ويخلون هالموظفين يدورون بالشوارع لين ما يبقى ولا سعودي ما يقرأ هاللوحة، وش جاب الضغوط النفسية والامراض غير اننا طايرين في العجة ولا ندري وش نبي، سرعه، سرعه، على غير سنع، قليل تشوف سعودي والا سعودية تلمح بعيونهم الهدوء والقناعة، الولد بسرعة يبي يصير غني والا مدير، والبنت بسرعة تبي تخرج وتزوج ملتي مليونير، نهايط بالقناعة وحنا اكثر ناس مطيورين، كن الدنيا تبي تطير، تلاقي اللي يوصيك على شغلة بعد خمس دقايق يدق عليك وينشدك: هاه وش سويت؟ اللي يشوفنا بقوقل يعني يطالع لنا من فوق يقول هذولا اكيد يشتغلون بمصنع نووي، السيارات طايره، والاوادم طايرين، والكل يبي يلحق شي ما تدري وشو! ومن تولع الإشارة خضراء تشتغل البواري كن ورانا اجتماع مع بان كي مون!