مخاوي الصحون

فيه ناس الله يساعدهم في هالدنيا عايشين متبهدلين، اللي لو اكلوا لقمة وحدة زاد وزنهم وانتفخت خدودهم وطلعت لهم كروش، لو ياكلون وجبتين ورا بعض لازم يغيرون مقاس الملابس، ما يحسدون الا الناس النحاف اللي ياكلون براحتهم ولا يبين عليهم، تحس انك مظلوم في هالدنيا، تشوف غيرك يلهط ذبيحة كاملة ولا يبين فيه سمنة، وانت جسمك ينتفخ كل يوم اكثر من الثاني، وكل اوقاتك رايحة من ريجيم في ريجيم، كنه مدعي عليك، تحاول وتحاول واخر شي تستسلم وانت تفرج على كرشك وهي كنها مخدة ريش، ولا مريت من جنب ناس تحاول تشفط بطنك عشان ما يضحكون عليك، لين ما عاد يقدر ثوبك يرقع على السالفة فتترك الحبل على الغارب لكرشك تمدد على كيفها، بعد امتلاك الكرش بشكل رسمي، وتعودك عليها، تبدأ عندك مرحلة ثانية، وهي انك تحط حرتك بالاكل، كنك تبي تنتقم من الصحون، ترز الكرش على الطاولة ثم تبدأ بتأديب الصحون، صحن داخل صحن طالع، خلاص ما عاد تفرق معك، اهم شي انك تملا كرشك ولا تخلي بنفسك شي، اكبر المشاكل لا وصلت مرحلة مخاوي الصحون، لا زعلت تحط حرتك بالاكل وكمان لا فرحت، ما يصير عندك طريقة تعبير الا بالاكل، تسكر اذانك وزي ما تجي تجي، مخاوين الصحون لازم ما يهملون صحتهم، وينتبهون من الافراط في لهط الصحون، السمنة اخطر شي ولازم نتحرك نكافحها، لازم يصير لها فرع بوزارة الصحة، زي مكافحة التدخين، الناس ذبحها الضغط والسكر وحنا نايمين لين نتوهق!