آل عويضة: أعمالنا شوربة وخل.. ولورنس عطوه وجه

- يقولون الأعمال الدرامية السعودية ماكله الجو صحيح هذا الكلام؟
والله إنك متفائل كثير أي ماكله الجو! إلا كلها ملاغة، بس فيه عمل ولا غيره.
- وشهو؟
أكيد طاش 17.
- وباقي الأعمال؟
شوربة وخل مو المسلسل الكرتوني قصدي أعمالنا فاضية من الطرح وكلها تهريج.
- على طاري شوربة وخل وش رايك في لورانس؟
بصراحة عطوه وجه.
- من تقصد في عطوه وجه؟
أقصد الناس اللي يسمعونه في البالتوك وقناة إم بي سي اللي نعتب عليها.
- بس يقولون وعدهم إنه ماعاد يقول كلام خارج عن الأدب؟
إنت قلت يقولون يعني ما هو تكانه.
- إلى الحين من خلال مشاهدتك المسلسلات السعودية والخليجية وش اللي أعجبك؟
غير طاش فيه مسلسل الفنانة حياة الفهد ليلة عيد وشر النفوس.
- وش تشدك أكثر الدراما وإلا الكوميديا؟
أكيد الكوميديا لأن حنا ملينا من الدموع والصياح.
- طيب من اللي يعجبك من الفنانين؟
ناصر القصبي وبعده حبيب الحبيب.
- ومن الفنان اللي ودك تطفي التليفزيون إذا شفته؟
يوسف الجراح.
- ليش؟
لأنه شخصية واحدة من يوم عرفناه.
- طيب شخصية مللت منها من خلال المسلسلات وتكررت كثيرا؟
مناحي للفنان فايز المالكي و رشيد فهد الحيان.
- بس فيه ناس حابين هالشخصيتين؟
بكيفهم بس أنا ما أعجبتني.
- مسلسل تمنيت إنه كانت له أجزاء؟
مسلسل عيال قرية.
- ممكن نعرف السبب؟
لأنه انظلم في جزئه الأول وكان مسلسل رائع.
- تتابع البرامج الدينية؟
أكيد خصوصا وقت الظهر.
- وش أكثر برنامج شدك؟
تصدق ما أعرف أسماءها بس أتابع.
- إذا الريموت في يدك وش أول محطة تحط عليها؟
شوف على حسب المسلسل اللي أتابعه وقتها بس إم بي سي أكثر قناة متابعة بالنسبة إلي.
- كيفك مع برامج المسابقات ؟
ما أتابع إلا برنامج واحد بس وهو سباق المشاهدين.
- وش عاجبك فيه؟
الجوائز حقته وطريقة تقديمه حلوه.
- وش رأيك في برامج الكاميرا الخفية؟
حلوه حتى لو إنها مفبركة.
أي برنامج تحب؟
برنامج حيلهم بينهم.