ابصم يا معلم وابصمي يا معلمة

وانا جالس بأقلب في الجريدة يمين شمال وكانت جالسة جنبي بنت اختي خديجة واللي بتدرس في سنة خامس ابتدائي وشوية حطت يدها على الجريدة وقالت ايش يعني الكلام ده يا خالو؟ فينوو يابنتي؟ اهو قدامك ياخالو فوق الجريدة واللي بيقول (التربية تعلن عن تطبيق البصمة على موظفيها في المدارس العام المقبل) ايش يعني بصمة ياخالوو؟ يعني ما عاد في بزوطة بعد كدة.. وايش يعني بزوطة؟ يعني ما عاد في غياب وزوغان (دوام يعني دوام) واللي حيغيب من غير عذر والا يفرنك ويفقع من الدوام ويروح مشواير ما لها داعي والا اللي عنده شغلة عند كاتب عدل لانه بعض المعلمين ما شاء الله عليهم صاروا (عقرجيه) حينخصم من راتبه كل الساعات اللي غابها والحق ما يزعل.. احسن ياخالو خليهم يستاهلوو من جد زودوها هادول المعلمات حتى اخويا فراس طفشان منهم كل يوم يسألني يقولي ايش اخدتوا في المدرسة اليوم اقوله ولا شي ابلة لغتي غايبة وابلة العلوم غايبة وابلة الرياضيات غايبة واشوفه يضحك ويقولي انا كمان زيك في مدرستي المتوسطة ما يعدي اسبوع الا وعندنا حصص فاضية لان المعلمين غايبين بسلامتهم، يخلونا بس نصحى من عز نومنا ومن صباحية ربنا وفي الاخير لا هم حضروا ودرسونا واستفدنا ولا هم خلونا نتهنى بنومنا، تركتني خديجة بعد ما زهمتها امها وجلست افكر في كلامها وفي كلام اخوها واقول بيني وبين نفسي ليه كده يا بعض من المعلمين وليه كده يا بعض من المعلمات وخلو بالكم ترى انا قلت (بعض عشان لا تشرشحوني وتقولولي وانت يبو فتو ايش اللي حارق رزك) ياهوووه ايش لزمة الغيابات هادي اللي بتحصل في المدارس معلمين ومعلمات بيغيبوا بالكوم عن مدراسهم والضحية اولادنا وبناتنا وفوق كل ده ما تبغوا وزارة التربية والتعليم انها تطبق نظام البصمة عليكم، وبعدين يكون في علمكم اصلا وزارة التربية والتعليم ما طبقت نظام البصمة ده الا من بعد شكاوي مديري المدارس او من الخطابات اللي بتوصلها من اولياء الامور واللي بيشتكوا من كتر غياب المعلمين والمعلمات عن حصصهم وبعدين يا معلم وانتي يا معلمة اذا عندكم مشاوير خاصة ولازم تقضوها في نفس اليوم الدراسي نسقوا ما بين زملائكم وزميلاتكم عشان يغطوا على حصصكم اما انكم كل يوم والتاني وانتو خارجين سردادي مردادي وتتركوا المدرسة كدة على البحري ما يصير ولا يرضي ربنا اولادنا وبناتنا امانة عندكم حللوا رواتبكم عشان ربنا يبارك لكم فيها اما كل يوم والتاني غيابات في غيابات ترى هادي الحكاية بالمرة تضايق وتزعل الابهات والامهات في البيوت وانتو ادرى وابخص وعيشوا كتييييير تشوفوا كتيييييير.