أبو فتو تاجر عقار

دحين انت كل دقيقه حتقعد تطقطق على الجوال الجديد ده ياريتك ما اشتريتوو ولا تعلمت حتى استخداموو؟ والله انك صادقه كنت مرتاح بالجوال ابو هندل القديم لا واتساب ولا بي بي ولا كيك ولا فايبر ولا حتى تانقو كمان لكن ايش نسوي لازم نجاري الجيل الجديد والا تبغيهم يقولوا عليا دقه قديمه وعتقي.. طيب ومين ده اللي كل شوية راسلك واتساب؟ والله يا ستى هدا واحد من الحبايب الله يهديه ويسامحه دخلني في القروب حقتهم وكل اللي موجودين في القروب (عقرجية) يعني تجار اراضي، جبلي الجنان باسعار الاراضي والمخططات، وانت ما لك وما لهم هما هوامير وتجار اراضي وانت طفران كحيان غلبان داخل بينهم ليه؟ يا ستي لا تدققي ويقولك المثل جاور السعيد تسعد، طيب ارسله رساله يشوف لك ارضية بسعر معقول؟ ههههه بسعر معقول قولي بسعر مجنون هوه عاد باقي اراضي بسعر معقول الهوامير كوشوا على كل شبر في البر والبحر واذا كانوا يقدروا يلطشوا الجو كانوا لطشووه، الله يعين وزارة الاسكان ووزارة الصحة ووزارة التربية والتعليم مو لاقيين اراضي بسعر معقول عشان يسوو مشاريعهم تبغي المواطن الغلبان يلاقي ارض بسعر معقول تجار العقار دول اكلوا الاخضر واليابس وما تركوا للغلابا شي احتكروا كل شي سواء كان اراضي او مخططات او فلل او حتى شقق تمليك وتبغي المواطن صاحب الدخل المفقود يلاقي ارض والا شقه بسعر معقول لكن الواحد ايش يقول الا يارب فرجها من عندك وارزقنا الجنة ونعيمها، وشويه تجي رسالة واتساب من واحد من العقرجية تقول الرساله ارض مساحتها 140 ألف متر مربع مطلوب للمتر 5500 وبعدها بشوية تجي رساله تقول مطلوب ارض على البحر استثمار مساحتها 10 آلاف متر مربع هدا غير مزادات المخططات واسعار الفلل والشقق التمليك اللي بتوصل اسعارها مبالغ مخيفه فوق مستوى العقل والقانون، يا ستي قيمة هادي الاراضي اللي قولتلك على مساحتها تساوي اكتر من مليار ريال وهيه اراضي بس يعني تراب في تراب وتجي تقوليلي ارسلهم رساله عشان يشوفولي ارض بسعر معقول عشان كده بقول لكل المواطنين الغلبانين الكادحين لا تحلموا انكم تلاقوا ارض او حتى سكن بسعر معقول طالما هوامير العقار جالسين يلعبوا بسوق العقار على كيفهم وعلى هواهم وما في احد قادر يردهم وزي ما قالوا لفرعون ايش فرعنك قال ما لقيت احد يردني وعيشوا كتيييير تشوفوا كتيييييير.