دردشة في مركاز

في أشياء لما تشوفها تجبلك الضغط والسكر وأول هادي الأشياء إشارات المرور تكون واقف عند الإشارة وتجلس تعد في الثواني يا تعاسة اللون الأخضر كلها 18 ثانية في بعض التقاطعات المزدحمة لكن ثواني اللون الأحمر تتسمر 100 ثانية سواء كانت التقاطعات مزدحمة أو غير مزدحمة، يعني ما يكفي حرقان الدم اللي يجينا من الشغل ومن البيت ومن طلبات المدارس اللي ما تخلص رغم أن الدراسة على نهايتها وهادولا ما عندهم الا هات هات وفوق كل دا تجيك الاشارات تكمل الناقص بالله عليكم لو كان واحد معاه في السيارة مريض حيموت وإلا معاه أخته وإلا زوجته على وشك ولادة ايش يسوي والإشارات تشتغل بالشكل دا وغير كده لما تكون ماشي في أمان الله وما تشوف إلا والسيارة اللي قدامك يترمي منها مناديل الورق وقراطيس القنبري وعلب البيبسي والعصيرات.. أنا أبغى أسأل هادولا الناس اللي بيسوو كده يرضو يصير في بيتهم هادي الشعتره حيردوا عليك بالفم المليان بأكبر كلمة (لا) في العالم طيب يا ابن الناس ادا ما ترضاها في بيتك كيف ترضاها على الشوارع اللي الدولة بتخسر دم قلبها عشان تخليها نظيفة وحلوه لكن البعض منكم ما ينفع معاه الا انك تصكه بقسيمة نسميها قسيمة بدل نظافة، وغير كده لما تشوف فيلم الكرتون (البس والفار) اللي كنا نشوفه زماااان في التلفزيون أيام الأسود والأبيض واللي ما زال يعرض في بعض القنوات تزكر هادا الفيلم وأنت تمشي برجولك لما تروح تصلي الفجر وتشوف يا كتر الفيران اللي منتشره بالملايين في كل شارع وزقاق أنا ماني عارف متى حيتحركوا المسؤولين اللي في أمانة جدة ويخلصونا من هادي الفيران،، انا اقولكم متى أكيد لما تنتشر الأمراض المعدية ويكتروا الوجعانين في الصحية،، وغير كدة لما تكون ماشي بالسيارة في شوارع جدة شمالها وجنوبها وغربها وشرقها ما تخرج من هاديك الشوارع الا والسيارة مدحملة والشكمان مهربد والعمامة مشعترة والنظارة معوجة من كتر الحفر والمطبات اللي في الشوارع وغير كدة لما تسمع كل يوم انه اسعار المواد الغذائية كل يوم بتزيد ومافي احد يحميك من هدا الغلا اللي هلك المواطن الغلبان وكله كوم وايجارات الشقق كوم برضو كل سنه بتزيد وبرضو مافي احد يحميك وكل اللي بنسمعه من تصاريح حبر على ورق لكن الواحد ايش يقول الا يارب رحمتك فرجها من عندك يا ارحم الراحمين وعيشوا كتيييير تشوفوا كتييييييير..