السكن يا وزارة الإسكان

بالبلدي الفصيح

وانا داخل السوبرماركت اللي جنب البيت الا واشوف واحد من الزباين خارج منه وجالس يبحلق فيا بعيونه.. قلتلوو ترى يخلق من الشبه اربعين،، عارف يا حبيبنا بس انت شكلك مألوف ومعروف انت اللي بتكتب في الجريدة؟ ايوه انا بشحمو ولحمو وما خلصت من كلامي الا وده يقولي اشتري عازاتك وانا حستناك بره ابغاك في موضوع تتكلم عنه في جريدتكم.. وخرجت من السوبرماركت الا واخينا يدق بوري السيارة ويقولي اركب عشان افهمك ايش الهرجة.. ركبت السياره وبعد 100 متر وقف اخينا سيارته قدام برحة وخرج جريدة كانت مزنوقة مابين مقاعد السيارة وقال شوف خبركم اللي كان منشور الاسبوع اللي فات خبر يرفع الضغط ويجيب السكر.. الإسكان.. الإيجارات لم ترتفع خلال 90 يوما.. المستأجرون: انزلوا الميدان.. هدا عنوانكم اللي كان مكتوب بالبنط العريض في جريدتكم وشوف ايش بيقول في بدايته أكدت وزارة الإسكان أنه خلال الثلاثة الأشهر الفائتة لم يسجل أي ارتفاع في الإيجارات ياسلام سلم على اي اساس بتقول وزارة الاسكان انه الايجارات ما ارتفعت كده بس سبهلله.. وشويه يفتح درج السيارة ويقول شوف هادي عقود تلاته سنوات من الايجارات حق الشقة اللي ساكن فيها اول ما سكنت سكنت ب18000 الف وتاني سنة رفع الايجار عليا من 18000 الى 24000 وتالت سنة ل30000 وتجي وزارة الاسكان بسلامتها تقول إنه الاجارات ما ارتفعت ياناس حرام عليكم فين نروح نسكن ووزارة الاسكان ساكتة على اللي جالس يصير ولا هامها اذن من طين واذن من عجين، ملاك العماير ما في احد قادر يوقف في وجههم كل سنة وهما طابين على المستأجر (يا تدفع يا تنقلع) ولا يقدروا العشرة ولا الجيره ما يهمهم الا الفلوس حيموتوا وما حياخدوا معاهم الا كفنهم وقطنتهم من فين نجبلهم نحنا، عمايرهم قديمة وحالتها بالبلا والبلا لاحقها وفوق ده يبغوا ايجارات عالية وعذرهم انه الاسعار ارتفعت عليهم يعني هما بس اللي الاسعار ارتفعت عليهم طيب والغلبان ده ابو الدخل المفقود ايش يسوي مو برضو الاسعار نكبت عفشو وخلت حياته هم في غم.. ياوزارة الاسكان الايجارات هلكتنا والاسعار دمرتنا واصحاب الدخل المحدود بيقولوا يايدي فكي حلقي، يا وزارة الاسكان ارحمينا من جشع وطمع ملاك العماير اللي ما يخافوا الله في عباد الله وسوي قوانين وانظمة تحمينا من جشعهم وطمعهم، يا وزارة الاسكان عجلي في موضوع السكن للغلابا من الناس وبلاشي من الاخبار اللي بنقرا عنها كل يوم واللي كلها حبر على ورق نبغى قول وفعل نبغى سكن يسترنا ويستر اولادنا والاراضي الفاضية على مد البصر في وسط جدة وبرة جدة ابنوا فيها مجمعات سكنية وخلوا بعد كده ملاك العماير يدوروا على المستأجر في احلامهم وارحموا من في الارض يرحمكم من في السماء وعيشوا كتييييير تشوفوا كتيييير زي ما بتقول يا افندينا كل اسبوع.
حديث شريف قال رسول الله صلى الله عليه وسلم: ( المؤمن للمؤمن كالبنيان يشد بعضه بعضاً، وشبك بين أصابعه). متفق عليه، يقروه ويسمعوه لكن للأسف ما يطبقوه.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 127 مسافة ثم الرسالة
abofatoo@hotmail.com