مخططات المنح يا أمانة جدة

بالبلدي الفصيح

كل سنة وانتو بخير وصحة وسلامة يا حبايب ومليون مبروك لكل الاهلاوية خاصة والرياضيين عامة تأهل النادي الملكي للمباراة النهائية ولا يصح الا الصحيح على قول الاتحادي المعتق جمال عارف وإن شاء الله بكرة بإذن الله تفرح بلدي وشعب بلدي بتحقيق النادي الاهلي لبطولة آسيا للأندية قولوا يا رب وانا عارف انه في بعض من الجماهير اللي بالي بالكم يتمنوا انه يفوز اولسان الكوري وياخد البطولة ولا ياخدها فريق بلدهم ولهادي الجماهير اقول الله يهدي ما خلق وبلاشي من التعصب اللي ماله داعي.. ما علينا خلونا ندخل في هرجتنا حق اليوم.. قوم يا سيدي سامعه دوشة وهرج وغشنة عند باب العمارة.. وانا ايش لي شغل كل ما صارت غشنة عند باب العمارة تجي تمتحنيني؟ وشوية اسمع الجرس يندق واسمع واحد يقول يبو فتو نحنا جيرانك افتح الباب نبغاك في هرجة.. قلت للحرمة قومي جهزي براد شاهي ودلة قهوة خليني اشوف حبايبي الجيران ايش عندهم.. وي يا سيدي كده حتقابلهم بالفوطه والفلينة ابو عسكري اللي من ايام هتلر؟ يعني ايش رايك اقوم البس بنطلون شرلستون.. طيب خلاص يا سيدي لا تزعل نفسك.. وفتحت الباب ودخلوا ستة رجاجيل وكل واحد منهم شايل في يده صك.. كيفك يبو فتو عساك طيب وسامحنا جيناك كده من غير احم ولا دستور.. ولا يهمكم اتفضلوا البيت، بيتكم وبعد حاني وماني.. قال واحد منهم يبو فتو دخيلك اكتب عن المنح اللي بتوزعها الامانة تراها بهدلتنا بهدلة.. ونط واحد من الرجال وقال وهوه زعلان ومضايق يعني الامانة تعرف توزع المنح بس وبعد كده مالها شغل وبعد ما نستلم الصكوك تتركنا كده غرقانين في هادي الصحاري اللي وزعتها علينا يعني لا سفلتة ولا إنارة ولا دخلت الخدمات فيها وتركتها كده صحراء وكل ما رحنا نشوف اراضينا نقعد نغني «حادي بادي كل في هادي»، عشان نعرف اراضينا فين مكانها.. والا عاجبها شغل الهوامير اللي اكلوا الاخضر واليابس واللي كل يوم منزلين اعلانات في الجرايد «نشتري اراضي المنح بأفضل الأسعار» يا ناس يا هووه يا امانة جدة سفلتي المخططات اللي لها اكتر من 20 سنة وحالها لا يرضي لا عدو ولا حبيب.. يا ناس يا هوه يا مسؤولين يا امانة جدة دخلوا الخدمات في المخططات وخلي الغلابا من الناس تبني وتسكن وترتاح من طمع وجشع اصحاب العقارات والعماير اللي ما في قلوبهم رحمة في عباد الله وارحمينا من الوعود والكلام اللي بنسمعوا من وزارة الاسكان.. المهم شربوا الرجال قهوتهم وشاهيهم وجو خارجين من البيت وانا اقولهم الله يعينكم ويساعدكم وتفرج بإذن الله.. هاااه يا أمانة جدة ايش عندكم رد للحبايب.. وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com