حكاية من الحياة

الحل

زي العادة وكل يوم بعد صلاة المغرب وصل أبو قدور إلى المركاز وهو لاوي وجهه مو زي عادته استقبلته البشكه بسؤاله إشبك على شمسك غيوم يا أبو قدور؟ وما صدق أبو قدور إنه أحد نكشه عشان يخرج كل اللي في قلبه. رد عليهم وقال والله يا جماعة الخير صرنا محنا عارفين نلاقيها من فين، اليوم رحت شركة الكهرباء عشان أدخل عدادين أبو 60 أمبير للعزله اللي بنيتها في المخطط الجديد وما أصحى إلا موظف الكهرباء ومن راس خشمه كأنه بيجمل علي من كيسه يكلمني ويقول إن النظام أتغير ودحين صارت العدادات بالكيلو فولت قولتله كيلو فولت وإلا كيلو عدس هات من الآخر وقلي كم أدفع عشان تدخلولي الكهرباء. تصدقوا إني كان حيجبني فالج لما قال لي الرقم رديت عليه وقلتله يا واد أنا أبغى عدادين ما بدي أسرج البلد كلها قال لي وبعجرفه هذه التسعيرة الجديدة وكر خليني أشوف غيرك. طيب ليش يا جماعة شركة الكهرباء لما هدموا بيتنا اللي في الشامية وشالوا العدادات بدون ما يرجعوا لنا ولا قرش ما يعوضنا بعدادات بدل حقتنا في بيتنا الجديد بدل مو كل شويه هات فلوس وإلا أقعد على المروحه الخصف والزير في الصيف اللي جاي. والله يا جماعه صار الواحد مو عارف يلاقيها من فين؟ من الكهرباء والا التلفونات والا مصاريف استقدام الخدامة لأنه أم العيال كبرت وركبها ما تشيلها ولازم لها خدامه عشان تشيل عنها عبل البيت وبزورة بزورتنا لما يجونا خميس وجمعه. صحيح لما قالوا اللي ياكل الضرب مو زي اللي يعده. وسامحوني دوشتكم.
رد عليه اليابا وقله إذا ما دفعت ودخلت الكهرباء دحين يمكن بعد كم يوم يقولولك ما في إمكانية وحطلنا محطة تحت بيتك عشان ندخلك الكهرباء زي ماسوو في عديلي عباس وخسروا إيجار دكان كان مؤجره بسبعين ألف ريال ويا ريت دفعوله إيجار والا راعوا في السعر لا وفوقها هما مجملين عليه ويوزعوا كهرباء على البيوت اللي جنبه من المحطه والغله لهم لوحدهم هذا عدل يا جماعة والإ عشان الواحد ما يحب يشاكي كل يوم والثاني في المحاكم. رد عليه وجيه الحاره وقال ليه يا ناس ما تبرقوا للمسؤولين وأنا متأكد أن عندهم الحل.
وإلى اللقاء في المركاز