إيه أعرفك

مدري لو كنا التقينا .. في زمن غير الزمن
إيه أعرفك بس مدري .. كنت من وكنت من
ما أظن إني أعرفك
رغم إني زين أعرفك
مدري وشلون التقن
ذي عيونك ما قد احتضنت عيوني
وهالجسد
ما أذكر بمحراب ذاكرتي سجد
بس أعرفك
فين شفتك؟
فين شفتك؟
يا فكر عقلي مدد
روحها اللي هي بها ...
كانت لذات الجسد؟
إيه أعرفك
إيه أعرفك
روحك أعرفها أكيد
لو جهلته هالاسم
الوكاد إنا التقينا في زمن ثاني بعيد
مدري وش كنا لبعضنا
مدري كنت لي حبيبه
مدري أم
مدري لو كنت بعيني
في زمن نور القمر
الوكاد إنك قريبه
وهذا هو اللي أهم
بس ودي اتذكر
حينها كنا بشر؟
إيه أعرفك
إيه أعرفك
وأشعر أنك تعرفيني
والدليل أنك سريتي
وعينك اتناظر بعيني
تشعري باللي شعرته؟
تعرفيني زين
لكن تجهليني!!
إيه أعرفك
إيه أعرفك روح وأشعر بك قريبه
إيه أحسك نبض وأنفاس وجراح
إيه أعرفك بس به حاجه عجيبه
ما أعرفك شخص: أشعر بك رياح
إيه أعرفك بس أوصافك غريبه
كني أعرفك ليل وألمح بك صباح
مدري كنت في عمر آخر حبيبه
مدري كنت طير مكسور الجناح
الوكاد أعرفك بس الأمر ريبه
أشعر إنا من زمن عدى وراح
مدري كنا به بشر أو كنت لي به
جذع وآنا كنت لجذورك بطاح
ولا انا بستان وأنت عندليبه
به تغني نغمة السحر المباح
مدري كنت النور: اشراقه .. مغيبه
تشرقي بعيون .. تغرب بك قراح
فين روحك قبل تسكن بك ربيبه
هو صحيح الروح لا متنا تتاح
في جسد آخر بظله مستطيبه
أو بظلمه ترجي إطلاق السراح
ولا لفاه الموت تتركه وتسيبه
وتنولد فرحه على وقع النواح
فرح قوم عند قوم آخر مصيبه
كلهم ضدين مبداهم صياح
شوفي كيف شلون تاخذه وتجيبه
عقلي أفكاره ولا هو الي استراح
جاوبيني ما أظن غيرك يجيبه
هالسؤال اللي حمى روحي استباح
كيف ما أعرفك ورغم أنك قريبه؟
وكيف أعرفك ليل والمح بك صباح؟
إيه أعرفك
مدري لو كنا التقينا .. في زمن غير الزمن
إيه أعرفك بس مدري .. كنت من وكنت من
ما أظن إني أعرفك
رغم إني زين أعرفك
مدري وشلون التقن
أكرم التلاوي