ياخوي

ياخوي جيتك خطايه قدح وارضي زناد
والقلب جمرة غضى والوقت نار وفتيل
اشهق نفس من لهب وازفر نفس في رماد
وليالي السود حبلى والمغاتير حيل
حالي ويعلم به الله والبقاء للسهاد
والحيل مهدود حيل الله على كل حيل
والحر لولا سبوقه ما انكسر عن هداد
والذيب لو سد جوعه ما عوى كل ليل
ياخوي من غيرك ان ضاقت علي البلاد
يحط عني غرابيل الزمان ويشيل
سقوى سنين الجهاله قبل سن الرشاد
ايام كنا نعد الأرض مضمار خيل
ان طحت قدام عيني قلت: كبوة جواد
وان طحت قدام عينك جيت تصهل صهيل
واليوم ما طحت لا والله يابو زياد
لو شفت في محجري دمعة وعيت تسيل
من يوم ما صرت لحلوق المقادير زاد
وانا اتوجد على صبري واخاوي سهيل
اسج رجلي خلا واهيم في كل واد
اسجها من كثير ولا حصل لي قليل
القلب بستان طيبة والعواذل جراد
تغانموا كل حاجة غير روس النخيل
اخلاقي اللي عن دروب المذله قياد
وسلوم جداني ومبداء علو الأصيل
ان عرضوا لي سموم الهرج سقت البراد
وان وجهوا لي سهوم اللوم راسي طويل
لكنهم روجوا حكي .. وتمادوا سواد
(حسبي على حكيهم ربي ونعم الوكيل)
ياما على شانهم لينت رووس الشداد
ابغى الجماله ولا دورت رد الجميل
زرعت فصدورهم طيبي .. ويوم الحصاد
ما بان فوجيههم من زرع طيبي دليل
ما اقسى من انه يطولك ظلم بعض العباد
الا ان من يظلمك له في عيونك مقيل
واصعب من العيش في الغربه وجور البعاد
مرار عيشتك فوجيه الليالي دخيل
ياخوي لا شفتني سجيت بالله ناد
اخاف تبطي بي السجه ولا به حصيل
راشد النفيعي