سحابة البعد

خاطرها ضاقت وشعر النبط وقف لخاطرها
وطيور فكري تهاوّت دونها ودوني
أثر الجفا يزجر الفكره ويأمرها
كنّها حمامه تْحاول تقضب غصوني
سحابة البعد رشتني بْماطرها
ثم سيّلت واديٍ في داخل ركوني
العام تروي خفوقي من مشاعرها
واليوم أبهدي لها من سلة شجوني
ريانةٍ يزهر الخوف بْنواظرها
مشكور ياحظي الشامخ وممنوني
تجتاحني لهفتي واسلا واصبْرّها
يحيا لها الحلم لو الحلم مدفوني
إليا أبتسم ثغرها قدام شاعرها
يصدح لها شعري الموزون ولحوني
أودّع الليل لاصاحت ظفايرها
واصحّي الصبح لاغابت عن عيوني
بديتها واحسبنّي واصل آخرها
عطيتها الود وأثري منه مديوني
ليت المسافه طويله كان أقصّرها
بس المسافه مابين العين وجفوني
توقد لي الشوق والهقوات تسهِرها
وانا على شوفها ابصم ومفتوني
مدام شعري مجافيني لخاطرها
ابسْهر الليل لين تنام بعيوني