لقاء خاص وحصري عبر صحيفة التميز الالكترونية مع رئيس رابطة نادي الاتحاد الاستاذ صالح القرني

عندما يصدح بصوته الجميل وطن وطن تهتز المدرجات طربا ..صالح القرني عندليب الاتحاد جعل لجمهور الاتحاد جمهورا آخر يعيد ويردد أهازيجه في كل مكان ..صالح القرني رئيس رابطة نادي الاتحاد بدأ حبه وعشق لنادي الاتحاد من الصغر في الحاره ثم مشجعا ثم لاعبا حتى أصبح رئيس لرابطة أكثر الأندية جماهيريه في القارة الاسيويه :
كل عام وانت بخير أستاذ صالح ؟
وانت بخير يابو غيداء وكل جماهير نادي الاتحاد وقراء صحيفتكم المميزه .
كيف بدأت قصة العشق لنادي الاتحاد ؟
الاتحاديين إحدى الأمرين ..ياورث هذا العشق أو عن طريق أولاد الحي ..فطبعا الوالد الله يرحمه ماله في الكوره بس صار يشجع الكوره لمن يشوفني أزعل لمن ينهزم الاتحاد وصار يتأثر لمن يشوفني زعلان الله يرحمه وكذلك الوالده وانا أخذته عن طريق الحي ..كنا زملاء نروح الملعب ونجي ..الكلام هذا في عز أزمات الاتحاد يعني ماكان فيه بطولات ..رغم هذا كله ..ومن حسن حظي اول مباراة حضرتها كانت الاتحاد والأهلي في الدوره التنشيطيه عام 1394للهجره وفاز الاتحاد على الأهلي 4 سجل النور الله يرحمه هدفين وسجل صالح العتيبي الله يعطيه الصحة والعافيه هدفين ..هذه بداية عشقي للاتحاد وصارت العلاقه قويه.
كيف أصبحت رئيسا لرابطة نادي الاتحاد ؟
طبعا أي اتحادي يبدأ كمشجع عادي ..كنت أجي النادي أتردد بعد ماانضميت ..عم يحيى الله يرحمه سجلني كلاعب كرة قدم عام 1396 للهجرة ومااستمريت ..دراسه والوالد ضغط مانع كوره ..انتبه لدراستك ..رجعت عام 98 أو 1399 للهجرة كان فيه دوره منضمها أحمد خواجي الله يرحمه أخو عيسى خواجي دوره في حي السبيل بعدين جاء حسن باصفار وحسن باسويدان ونقلوا الدوره للنادي في البغداديه واختاروني أنا ومجموعة من الدوره الرمضانيه وسجلنا في الاتحاد كرة طائره وكان كابتن شباب الاتحاد جمال عسيري الله يعطيه الصحة والعافيه وكان في الفريق الأول حسب مااذكر كليبي ومحمد عسيري وجملة لعيبة من الكبار وانقطعت بعدها تقريبا سنتين أو ثلاث ورجعت عن طريق رابطة المشجعين وتعرفت على أخونا عبدالغني اللي علاقتي استمرت معه لحد الآن من عام 1403 للهجرة حتى سكنا جنب بعض من كثر المحبه اللي بيننا فانضميت من وقتها لحد عام 1411 في عهد رئاسة أحمد مسعود استلمت رئاسة رابطة الاتحاد .
احكي لنا عن صالح القرني اللاعب ؟ كنت لاعب كرة قدم ثم لاعب كرة طائره في نادي الاتحاد واستمريت سنه لاعب طائرة وحققنا بطولة المملكه للشباب ضد الهلال في صالة وزارة المعارف وكان الكابتن حينها جمال عسيري ، بعدها انقطعت سنتين أو ثلاث ثم عدت للمدرج الاتحادي حتى انضميت للرابطه.
الجماهير الرياضيه في دول الخليج أصبحت تردد أهازيج صالح القرني ..ماهو شعورك ونظرتك وأهازيجك تردد في كل مكان ؟ طبعا تفرح لأن ماتقدمه لقي صدى وفي نفس الوقت اللي قدمناه اول واللي نقدمه الحين مافيه أحد قدر يغيره اللي موجود في أي رابطه كله متوارث من اللي قدمناه ..زي حبيبنا ونديمنا مكتسبه من الدوري الأوروبي أضفنا عليها كلمات ودمجناها وعملت جمال وان شاءالله مع بداية الموسم القادم أهازيج جديده كما عودتكم الرابطه . أستاذ صالح في ليالي الشهر الكريم حدثنا عن ذكريات طفولتك في شهر رمضان؟ زمان كنا على الاتريك كانت ليالي رمضان جميلة وجمال رمضان ماكان فيه سهر مثل الحين وكان أيامنا مدارس في رمضان ننام ونصحى بدري ..الآن أجمل من قوة التواصل وعدد الناس زاد وعدد أصحابك زاد في السابق كان التواصل أقوى من الآن وكان تأخذ الصحن وتلف على الجيران توزع من فطور بيتكم الجيران يتبادلون الطعام قبل الإفطار .
من هي الشخصية التي تحرص على الافطار معها ؟ زمان كنت احرص على الإفطار مع الوالد والوالده أما الآن بناتي احرص على الإفطار معهن .
كلمة لجماهير نادي الاتحاد ولقراء صحيفة التميز ؟ اشكرك يابو غيداء وربنا يعطيكم القدره على الضغط القوي والجميل على عشاق الاتحاد على التحلي بالقيم في الملعب والبعد عن من يثير الفتنه وسط المدرج الاتحادي بعضهم يجي مخصوص عشان يثير جمهور الاتحاد ..جمهور الاتحاد عاطفي يعشق ناديه.. أشكرك يابو غيداء وتحياتي لجمهور الاتحاد الولهان .