نجران بقيادتك تحققت فيها آمال

قصيدة مهداة إلى صاحب السمو الملكي الأمير/ مشعل بن عبدالله بن عبدالعزيز
أمير منطقة نجران حفظه الله
على الله العون بالميقاف والاتكال
ارجوه يهدي ويرشدني سواء السبيل
البارحة كن وسط الراس ساحة نزال
مابين صوت الصليل وبين صوت الصهيل
سرا عليّ القصيد وصال فيني وجال
مابين طاري رحيل وبين طاري نزيل
البيت الاول يقول اسبح ببحر الخيال
والبيت الآخر يقول الصدق ماله بديل
وانا اعرف انه ليا اسودت وجيه الليال
ما تشرق الا بنورً مثل شمس الاصيل
وجهٍ ليا لد عينه للحمول الثقال
خفت ووجه السعد معروف واسمه دليل
مشعل ولد خادم البيتين سمح القبال
اللي بعدله موازين الوطن ما تميل
بالحزم والجزم والتوجيه والاعتدال
والعزم والمعجزات يطوّع المستحيل
اللي شموخه تمثل به شموخ الجبال
وتواضعه علّم الأجيال خلق النبيل
يبذل ويتفقد الاحوال في كل حال
ويتلمس اوجاع شعبه كل صبحٍ وليل
ما يرجي الا رضا ربه عزيز الجلال
عساه يجزى بخير وجعل عمره طويل
وان ولّعت شعلة الفتنه يحسم الجدال
ما يأدب المارقين الا بحد الصقيل
ياصل ويفصل ويستأصل هل الانفصال
ويحري ويذري ويستامن بظله دخيل
ان قال تصحي على قوله ضماير رجال
وان مدّ كنّ النهر من جود كفه يسيل
الدار في ظل ابو متعب زهت بالجمال
محميةٍ ما طمع فيها حقير وذليل
ارض ماهي تقبل التدنيس والاحتلال
من دونها صفوة الأمّه ودعوة خليل
اما انت يا مشعل النخوة بك الشرح طال
جيلٍ تقوده منارة مشعلك خير جيل
فعلك جوابٍ صريح لكل مبدا سؤال
وعزمك يروم السما العالي وفعلك جليل
متسلسلٍ من سلاطينً نهار القتال
ترغم عداها تذوق الموت والا الرحيل
اخوان نوره ليا قاموا يطيع المحال
الجدي يخضع من الهيبه ويخضع سهيل
ان جيت لك بالعمام او جيت لك بالخوال
ساده وقاده وحد حسام وسروج خيل
كامل ولله سبحانه صفات الكمال
متمكنٍ من سنام المجد والله وكيل
نجران بقيادتك تحققت فيها آمال
لين أصبحت في بحر حكمتك وجهٍ جميل
ما كنها الا العروس بليلة الاحتفال
تغضي بطرف بماتنجز يدينك كحيل
دونت قافي بواقع فعل ما هو خيال
من نفحة العود فيه ونكهة الزنجبيل
وعلى الله العون بالميقاف والاتكال
ارجوه يهدي ويرشدني سواء السبيل
محمد حمود السريّع/الرياض