العزا بوجود أبو متعب وأبو خالد عضيده

يا وطن يا كبر هول الصدمة وحب الفقيده
والخسارة يا وطن ماهيب مثل اية خساره
القضا ما دامه من الله رضت بامره عبيده
لو تجرعنا على فقدان أبو فيصل مراره
اربع وعشرين عام وكلها كانت سعيده
لين صرنا باول صفوف التطور والحضاره
كل خير في كنف فهد العروبه نستزيده
كن شعبه كل يوم يشوف من خيره بشاره
للجنان وروضة الفردوس يالروح الحميده
ألسنتنا بالدعا تلهج عسى الفردوس داره
يحفظ التاريخ للعاهل سجلات عديده
وصلتنا حنكة العادل لميدان الصداره
معجزات تجعل اسم الراحل اسم نستعيده
ومنجزات تنقش اسمه في جدار اعلى مناره
وسع اركان الحرم واصبح مساحات بعيده
والمساجد صممت باحدث معايير العماره
واستضاف ضيوف مكه والمدينة من رصيده
احتوى قلوب الاوادم بالمحبه والجداره
آخر أعمال الفقيد اعتق عن المسجون قيده
ما ذخر عنه العفو يوم العفو عند اقتداره
واستماعه للمواطن لين يدرك ما يريده
واهتمامه بالمعارف لين حولها وزاره
وانتصاره وانهزام الطاغي اللي بان كيده
وانتزاعه للكويت وفزعته قبل انتصاره
والعزا بوجود ابو متعب وابو خالد عضيده
والخلف مثل السلف نفس المبادي والمهاره
والوطن يرفع لهم بيعة غلا ماهي زهيده
ويتوافد حبنا للمصمك وقصر الاماره
كلنا في صف واحد يا حكومتنا الرشيده
وكلنا طاعة وسمع وكلنا رهن الاشاره
والعلم يبقا لنا رمز التلاحم والعقيده
وكلمة التوحيد والسيف الحدب تبقا شعاره
وفاجعتنا ما يترجمها كلام ولا قصيده
الخسارة في فهد ماهيب مثل اية خسارة
وعظم الله اجر شعب المملكة بعد الفقيده
واجر كل المسلمين بكوكب ودع مداره