اللغز

كان لغز الاسبوع الماضي مرسل من الاخ عبدالعزيز البهلال من الزلفي، وقد نوه عن صاحب اللغز الشاعر الدكتور سليمان الغزي بتعقيب قال فيه:
الأخ العزيز عادي الشمري (حفظه الله)
اشارةً الى المكالمة الهاتفية مع سعادتكم بشأن لغز هذا الأسبوع والذي نقله الأخ عبدالعزيز البهلال، عليه أفيد سعادتكم بأن اللغز على النحو التالي:
أنشدك عن شيء(ن) إذا قطع راسه
دمه سوات القطن ينثر على القاع
ماينفع الماشي ولا به نجاسه
نفعه لعبدٍ هاوي(ن) بطن قطاع
وربما الأخ عبدالعزيز أشار بأن هذا اللغز للمرحوم الشيخ جاسر الجاسر وقد سقط ذلك سهواً، والمرحوم هو قريب للأخ عبدالعزيز وهو جدي لأمي، وقد طلب مني حفيده الشيخ أحمد الجاسر التنويه عن ذلك، آمل التنويه ..تحياتي.
وقد توصل للحل شعراً:
عبدالعزيز الله يديم الوناسه
يامرحبا والحل محفوظ ماضاع..
حليب (عشر) يبين من قطع رأسه
معلومة(ن) وصلت وبرخي لها أسماع...
محمد بن ابراهيم السبيعي - الرياض
لغز عجبني حبكته في مقاسه
وارسلت حلي صح ماني برماع
نبت العشر يدمع الى قطع راسه
هذا جوابي واقبل الحل في ساع
احمد بن ناصر المحرج-الرياض
حليب عشر لاشربها الصل حاسه...
بعض البشر لاقلت له قول ماطاع
وبعض البشر تصير عنده حماسه ...
عسى يكون الحل ماهوب مرماع
محمد عبدالله السبيعي - الرياض
انا اشهد ان اللغز محبوك ساسه
ومجود تجويد لو جاه مقلاع
نبات عشر نقطعه حد راسه
وحليبه اللي ينفع الجرح في ساع
شي مجرب مايبيله دراسه
ياكثر مانشوف نبته على القاع
خليف فهيد الحربي -الرياض
الحل واضح بينه قطع راسه ...
ارسلت مرماعي على طايل الباع
شجر العشر معروف جذعه وراسه ..
يشوفه اللي يعبر البر قطاع
فالح غازي الحربي - رياض الخبراء
انا اقول اللغز يبغى فراسه...
للي بوديان الصحاري لهم باع
ترا العشر واجد وعندي حماسه ...
على جواب اللغز يازين الاطباع
محمد ابو دحيم - البدائع -
اللغز جيد مبتداه واساسه ...
وانا بشارك مثل غيري بمرماع
هذي العشر للي براسه بهاسه ..
اوراقها تشبه كفوف بلا اصباع
علي رشيد الرشيد - رياض الخبراء-
اللغز حله ياجماعه وناسه
ما من وكاد نحل خرص وتوقاع
قلنا حليب أعشر ماجاء بكاسه
لا من قطع راسه على القاع ينداع
سعد صنهات السهلي-الدرعية
اليا اخذ الحطاب حبله وفاسه
لقى حليب بالشجر دون رضَّاع
حليب (العشَر) ما ينشرب وسط طاسه
ماينْدَم عليه حتى ولوضاع
عبداللطيف الحُمَيَّانِي - عنيزة
لغز الأسبوع
كتبه للصفحة الشاعر احمد بن ناصر المحرج ويقول:
انشدك عن رجلين متشابهيني
واحد طويل وواحد اقصر شويه
الاول دايم معك دوره مكيني
والثاني دوره ناقص عن خويه
يجيهم وقت فعلهم مايبيني
وافعالهم فاوقات تصبح قويه