مليكنا عبدالله

هز الخفوق وبيح الصدر كتمان
علمٍ لفاني تل قلبي وضامه
جل المصاب اللي شمل كل الاوطان
وعلى امة الاسلام نصب خيامه
فقدان قايدنا ماهوب أي فقدان
فقيدة الشعب السعودي إمامه
مليكنا فهد العروبة كحيلان
رمز السياسة والوفاء والزعامه
بحر الكرم جزل العطاء واف الافنان
المجد هيمن فوق ذروة سنامه
ما هان فقدانه على الناس ما هان
كم واحد مثلي تكدر منامه
ينعونه الأمه شبابٍ وشيبان
حيث إن أبو فيصل عزيز مقامه
بنى لنا في ساحة العز بنيان
امجودٍ ساسه وعلاّ طمامه
نهض بلاده نهضةٍ شانها شان
ورفع مكانتها بكل اهتمامه
طور حضارتها على كل ميدان
وزود كرامتها القديمة كرامه
وعشنا بخير ونعمة مالها اثمان
الامن ضافي والشريعة مقامه
وسع حرم مكة وطيبة على شان
المسجد الطاهر يخف ازدحامه
فهد فهد قضى على كل طغيان
سيفٍ على الغدار بتر عظامه
ليا شانو الجيران للجار ما شان
قال وحمى قوله وثبّت كلامه
يوم انتخاه اللي من الضيم بحلان
وقف لعدوانه بحزم وصرامه
له ماقف مشهود والعلم وكدان
يوم ان وجه الارض ثوّر عسامه
حسب لها من رايع الفكر حسبان
وفك النشب رايه وسلّة حسامه
اشتال حملٍ فوق حمله بليهان
نقل حمول فوق حمله ردامه
والشعب عنده كل ابوهم بميزان
اللي عطا كلٍ من الشعب زامه
هذي تراها للعدا قطعة السان
اليا صفا الحاكم وشعبه حزامه
وان كان يا شعري عن القول ونيان
(عليك شرهه واتغشاك الملامه)
مالك عذر يا شعر في بعض الاحيان
انقش على وجه الورق نقش شامه
ملزوم بمواساة ذربين الايمان
بفقيدنا اللي نلتزم في نظامه
ما اوفيه لو اكتب من الشعر ديوان
لكن ابكتب نبذة عن اسهامه
وخليفته للطيب والجود عنوان
الحاكم اللي فيه حلم ورحامه
مليكنا عبدالله الشهم ما لان
عزمه ليا من صار زجر وخصامه
شجيع من شجعان ماهوب بلشان
ليا جا نهارٍ فيه نطل العمامه
مواصل سيره على بصر وايمان
ونبايعه والامر يملك زمامه
ولي عهده منبع الجود سلطان
للخير في وجه ابو خالد علامه
سحاب جوده للاجاويد هتان
نشرت على كل البسيطة اعلامه
الله يعز اللي للاسلام عوان
آل السعود اهل الوفاء والشهامه
ويالله تلهمنا مع الصبر سلوان
وعسى فهد خير عمله في ختامه
وعسى ما قدم في حياته من احسان
يصير حرزه في نهار القيامه