فهد محبوب شعبه عزنا والشعب محبوبه

الا يا الله طلبتك يا الكريم اللي تعلم الغيب
ألا يا واحد بعد العصايه تقبل التوبه
أنا أطلب وجهك اللي ما التجابه واحد ويخيب
اليا جامسلم يرفع يدينه تغفر اذنوبه
بجاهك من علوم فاينه منها الرضيع يشيب
غريبه فالوطن والمجتمع ماهي من اسلوبه
ألا يافكرتي كيف الرجال اتضيع التهذيب
تضيع سلمها وتضيع مع شلات مذهوبه
ولا ياللي تخونون الوطن فيكم جميع العيب
سواد الوجه من راس الرجل فيكم لعرقوبه
ولا ياللي صوركم لحاكم للخيانه ركبت تركيب
مركبت على نياتكم طوبه على طوبه
علاكم والله أكبر ياهل التكفير والترهيب
عدد صوت المنادي فالحرم نوبه ورانوبه
تخونون الوطن وعلومكم فيها ومنها ريب
وطنكم لعن أبوكم لابسين اشماغه اوثوبه
تفجر للأسف وانته نحسبك من رجال الطيب
تغيرك الخبول اللي لها نيات مقلوبه
خيانتكم لدار أجدادكم شيء يشق الجيب
خسارة والدين اللي يخرب يوم ولدوبه
ألا ياكيف دارك يالفتى تقبل بها تخريب
ألا يالله دخيلك من خبول الوقت وخطوبه
ولا ياللي تقلب فالصحايف والحجج تقليب
ترى حجتك يامسكين معكوسه ومقلوبه
حصاني والحصاني تلتمس لا أوحت قنيب الذيب
حصانيتن تجر اذنابها بالفخ مقضوبه
ولا ياللي تحاول زعزعتنا فالزمان اتخيب
لحانا من شبيهك فالزمن ماهيب مرعوبه
ليا منا احتزمنا رمينا فالمجرمين ايصيب
سعوديين عزوه وحده ماهيب مغلوبه
سعوديين لاجات الصعايب مانعرف اصعيب
فطيم الديد منا مايخيب من تعزووبه
سعوديين لاناد الوطن مافيه رجل ايغيب
نضد الضد ونرد العدا عن كل رعبوبه
سعوديين بدو أو حضر ذا صاحب وذاك اصحيب
قبيله وحده والا أنت ياخوان والكوبه
سعوديين حفاظت عهود وللضعيف انثيب
ولانعرف نخون أو لانعرف الغدر وادروبه
سعوديين راعين الكرم والطيب والترحيب
زحازيح الرجال اللي سنام المجد عدوبه
سعوديين أهل طاعه وأهل طاله وأهل تجريب
لنا اسم مايخجل فالأسامي كان نادوبه
ولدنا من صغرته.. للولاء.. اندربه تدريب
لحب أملوكهم وايضاً التراب اللي تربوبه
ولا يا دارنا يحمالك ربي والجرح اتطليب
مكانك ياوطنا في صدور الشعب وقلوبه
تحت رايه فهدنا اللي ليا نادي عليه أنجيب
فهد محبوب شعبه عزنا والشعب محبوبه
وكل آل السعود اللي لهم فقلوبنا توجيب
محبتنا لهم فقلوبنا بالدم مكتوبه
كريمين اللحا اللي قدرهم مايحسبه حسيب
عزيزين الجناب اللي لهم هامات محسوبه
محمد بن مخلد الذيابي