هبي بريحه ياهبوب الشمالي

من قصائد الامس

يا ونتاه اللي برت جسم حالي
بري الدبا نبنوب غصن تغشلاه
على عشير بالموده صفا لي
وازريت أنوش حماه وانا اتعداه
غرو جبينه مثل خط الهلالي
سبحان رب صوره لين سواه
وحياة رب كمله بالجمالي
من مفرق الهامه إلى حد ماطاه
انه منول وامس واليوم غالي
واتلى زمانه بالغلا مثل مبداه
ماله حلي إلا مودة عيالي
اصغر عيالي بالغلا كنه إياه
لا ابطيب ماشفته وهو ماعنالي
عفت المكان اللي يغيظه ويجفاه
لو دلهوني عنه مانيب سالي
اشفق على شوفه واهوجس بطرياه
شوفه دواي وقل شوفه زوالي
حكيم طب جامع داه ودواه
حقه على إلى تزخرف قبالي
ابعد مزاره بالهوى واتمناه
وحقي عليه إلى اعترض له مجالي
يصفح ويلقاني على الطول والقاه
ما به من العذروب عنق الغزالي
إلا الزمان اللي حداني وعداه
ريقه حلا من در عفر متالي
لا روحن من مدفق سال مجراه
هبي بريحه ياهبوب الشمالي
كود الجنوب ومطلع الشمس تنصاه
عبث صبيت لعشرته من صبا لي
سجلي بنجله والموده مجازاه
ياما وياما فرقتنا الليالي
نجع مقيم وفرق البعد لاماه
أقفت مراحيله وانا اقفت رحالي
خليت مداهيله وعميت ركاياه
وخان الزمان بعشرته والتوالي
ورثت من يصفق شماله بيمناه
وعضيت بسرة شاهدي من هبالي
وونيت ونة من نقل داه برداه
اسهر إلى نام المعافى لحالي
والصبح اجدد ذكر حمام واسماه
هني دحش دب الايام سالي
ماولعه طرد العماهيج واغراه
ولا صلاه من التصاريف صالي
وذاق الفراق وتاه مثلي بمسراه
ياطول ماطاوع نسيم الهوا لي
من قبل يبدي لي من الوقت مجفاه
واعتضت من عقب الجديد السمالي
ولا ينفع الفايت ولو قيل محلاه
ليتي قريب له وبيته موالي
والعلم من بيني وبينه مناجاه
ان كان له بمواجهي مثل مالي
وقلبي معه يبراه والهم يبراه
وإلا تراني عنه طاون حبالي
يلقى وانا القى واحد كنه إياه
مانيب من يتبع خفيف الخيالي
إلى تحدر بارقه عفت مرعاه
هذا وصلوا عد رمل السهالي
على نبي (ن) شيع الدين واحياه
وآله وصحبه كلهم بالكمالي
واللي تبع سنة نبيه ومجراه