ياظالمة

ياظالمه .. كيف اقدر اكرهك وانساك
اصدقه لو غيرك اللي يقوله
ياظالمه .. طلت العزاء عقب فرقاك
والكره والنسيان وشلون اطوله
ياظالمه .. بعد الوله كيف بجفاك
انتي مريضة نفس والاّ مهبوله
ياظالمه .. بعد استوا العمر وش جاك
ولاّ تجاوزتي غرام الطفوله
ياظالمه .. مايكفي اني برجواك
بذرت حب ماجنيت محصوله
ياظالمه .. حفظت حبك ومبداك
حفظ العوائد في شرايد حموله
ياظالمه .. تغني عن المال ذكراك
لو خذت من كل الطواري عموله
ياظالمه .. ظامي ولا نلت من ماك
الاّ حديث مانسيت معسوله
ياظالمه .. عليت حبك بالافلاك
وكل الطمان ابعدت ماجيت حوله
ياظالمه .. كم هانت النفس لرضاك
والضعف في بعض المواقف رجوله
ياظالمه .. لك موعد عند مولاك
بيومٍ جميع المايلات معدوله