هذي طراة الروح

يا لايمي لاذقت حب المغاتير
جرد الرقاب مدلهات الحزيني
اللي لهن حشمة وقيمة وتقدير
عند الرجال بما ضيات السنيني
من دونهنه ينطحون الطوابير
ومن دونهنه يرخصون الثميني
برواحهم يفدونهن المناعير
ويكفيكم التاريخ ياجاهليني
ياما وياما من رجال مشاهير
على جررها خيلوا طايحيني
صاروا عشا لمعكفات المناقير
راحوا وأهلهم يلطمون الجبيني
يا عنك والله ما قنوها المثابير
نويت أكثرها عسى الله يعيني
أبي ليا طاح الحياء والمحادير
أسوقها واخاشر الأوليني
ياما حلا شوف الفحل والمعاشير
وخلفاتها ترا زمن بالحنيني
وتعاطفن بالدر فوق المصاغير
من فضل ربي درهن كل حيني
في موقع ما طبه أجرا من الطير
هو منوة اللي للحيا مهتويني
فيه الخزاما والنفل والأزاهير
والعشب فيه ويعجب الناظريني
تجربه هاك الطيور المجارير
بالحانها اللي تطرب السامعيني
منظر طبيعي ما يصور بتصوير
ولا خطه الرسام بالريشتيني
الجو صافي والهواء نسمته غير
هاذي طراة الروح للعارفيني
يسلون فيها والليالي مدابير
أيام والا كلنا راحليني