مزن القصايد

على المحبه عظيم الشوق سابقني
يا من غرامك سطا في داخل اعماقي
ان قلت احبك ...امانه معك صدقني
رسمت صورتك في قلبي وباحداقي
رسمتها يوم بحر الشوق مغرقني
وسامرتها طول ليلي لين الاشراقي
جمالها عن جميع الكون يسرقني
ويشدّني الشوق وآقف لك على ساقي
والدمعه اللي على طرياك تخنقني
دمعة غلا من غلا طاريك تنساقي
غيوم حزني على شوفك تعانقني
وتهل مزن القصايد فوق الاوراقي
وطيفك الا من مشيت بدرب رافقني
يالهفة الشوق قلبي صدق مشتاقي
تدري وش اللي معك با الذات مقلقني؟
آمال قلبٍ على شوفتك توّاقي
طالبك... تكفى... دخيلك... لا توهّقني
على انتظارك تراها شانت اخلاقي
خذني من العالم المجهول واطلقني
معاك قلبي يهيم بغمرت اشواقي
العالم الله حنين الشوق محرقني
ومن سبّة الصمت حتى خاطري ضاقي
ان كان قصدك بصمتك ما انت طايقني
اقطع حبال الوصال وقرّر فراقي
بلاش تلعب على نفسي وتعلّقني
مادام حتى الصبر ماعاد ينطاقي
امّا تقفّي عن دروبي وتفارقني
والا اغتنم فرصتك والحق على الباقي
عادل سليمان المخلفي - الرياض