تاره أسوق القاف

تاره أسوق القاف يمشي معايا
وتاره أحس الحرف وسطي أسيري
وتارة وكن البيت يطلب رضايا
يافي معي مثل الصبي للأميري
وزود التعب ماخذ علينا وصايا
ساعة يمر إنسان أقشر حقيري
ياما أحس الشعر يطرد عنايا
يمشي بخطي مايخالف مسيري
والخلق تفرق في جميع السجايا
وأهل الشعر ياناس فرقه كبيري
أحد ٍبدع ياصف عيون الصبايا
تعبان ضايع في جمال الصغيري
سهران ليله ضاع بين الزوايا
من بعد نومه كان عقب الأخيري
وأحدٍ تمادى بالهجاء والنكايا
كن الحطيئة واضعه له سفيري
كلامه أقشر من نفوذ الشضايا
ولسان يشبه يابشر للشطيري
صحيح شاعر وأعترف بالبدايا
ماني أبوتمام ولاني جريري
قومٍ شعوره ينتقل بالروايا
وإلى اكتبت تكتب كلامٍ يثيري
والشعر وهبه من إله البرايا
يشبه خزامى فيضةٍ له عبيري
وإلى أرعدت سود الليالي سمايا
تمطر شعر وإحساس شيّن غزيري
وإذا صحو نحتاج بعض الدرايا
ولاكل شاعر بالمعاني خبيري
عبدالكريم إبراهيم بن خزيّم