صوت الصورة

يا حول يابعيرن تمايل من الجوع
من الظما والجوع شوفوا سنامه
الخير قدامه ولكن ممنوع
دونه حديداً خاف يكسر عظامه
فالح فلاح الرشيدي - الرياض
الجوع أقشر والعلف خارج الحوش
وأضطرت الناقة توايق تبي الكيس
أشبع حلالك لا تقتر مع البوش
سفن الصحاري معاصرات التضاريس
سعود عبدالعزيز الهزاع
- نعام
بعيد لو انك قريب من الشبك
متى يجينا الزول وآكل عشايا
يالله في روض خضر ما بها حبك
طليق حر ومنبسط في فلايا
محمد بن فهد الجلعود - سميراء
راعيه مقفي ناسي الكيس مفتوح
أركى على البرميل والشبك حزّه
الحاشي استسلم عقب طلعه الروح
شكله بعيد ويكفي العين قزّه
سعد الحماد - روضه سدير
هذا الجمل يشكي من الجوع مسكين
كيس الشعير يحاول إنه يطوله
ياناس ياللي تسجنون البعارين
حطوا عليها البال.. ولاّ افتحوا له
علي رشيد الرشيد - رياض الخبراء
الماء يقفِل والشبك دون الشعيري
بليهان ذا فِعْل اليدين البخيله
ربَّ السما يرزقك عِشب وغديري
تبْرك ضحا والشمس ما هي طويله
فهد بن عقيل الطويان - بريدة
شدّ العزم وأرجع ورى خمسة أمتار
وتعال طاير.. وأنقز الشبك يا بعير
وإلا إلعن الشيطان.. وأرضى بما صار
ترى الغنيمة كلها خيشة شعير
هليل فرحان الشمري - الرياض
ماظن تنجح معك أي حيله
دام الحواجز واقفه في أمامك
حتى ولو حاولت باية وسيله
ما غير تصبر لين تلقى طعامك
صالح علي المرفدي - القطيف
البل عن اللي ترغبه مقهوره
بعد الصحاري في الشبوك تعاني
تعيش وقتٍ عالمه مطيوره
ما يعرفون شفوفها من داني
سلطان بن حمد الحبابي - الطائف
يا حنتي حنَّت المحجور
فالشبك ومجوَّدن قيده
حتى العلف صايرن محظور
والناس كلَّن أكل عيده
عبدالكريم عبدالرحمن السلوم - القرائن
بالشبك ورزقي وراء الخزان
لابد أفكر على حيله
يا معزبي إلعن الشيطان
زادي يجي منك بالكيله
عبدالرحمن عبدالله الشمراني - الرياض
من علاوي نجد إلى ديرة تبوك
هذا مفلاها عساها للسمات
ويومنا الحاضر تغيَّر في شبوك
زين سجتها مع مغلا نبات
حمد عبدالله الوايلي - حوطة سدير
الجوع حاشرني وأنا ما تغديت
وكيس الشعير بعيد والشبك دونه
يازول أفزع لي وفزّع هل البيت
يقربون الكيس.. أو يفتحونه
خالد بن ناصر المخيمر - روضة سدير
صحيح ان البل ياجماعة عجيبة
سبحان ربنا ياكيف خالقها
إليا اشتهت شي لا بد تجيبه
ان كان بيدينها أو طول غاربها
محمد الحميدي - الرياض
يقولون العرب الطول عزاً لو هو من خشب
وأنا طويل ورغم طولي ما قدرت أنوش الكيس
يا صاحبي عجّل علي الظاهر إن رأسي نشب
حنا أمانة وإسمعه مني أنا مندوب العيس
محمد بن عبدالله بن حسن - الدعيسة
هذا زمان حدني وأشقاني
من عقب عزاً في الفقر والفاقه
من عقب ماني بالخلا طرباني
الشبك بيتي والشعير شفاقه
عبدالرحمن بن مدلول البداح - رغبة
صورة العدد
نرحب بمشاركاتكم الشعرية على الفاكس رقم 4871070
أو الإيميل الخاص بصفحة الخزامى:
rb-khozama@alriyadh.com
زاوية: (صوت الصورة).. ويا هلا