حزت الفخر مع وسام الريادة

هاج القصيد وشاش راسي وسميت
بّسم جليل الملك رازق عباده
بركان فكري ثار عجل وسجيت
آسطر أسمى قاف واحٌبك مداده
قاف يشرفني لمني تعزويت
يصهل صهيل العاديات بجلاده
شعر ينومسنى على موجه أرسيت
قوارب المعني واوثق شداده
أهيم به وأرقى الطوال وتعليت
أبيه سيف هايج من غماده
في مدح أبو نايف على موعدي جيت
محمد اللي يستحق الإشاده
موقف بطولي للشهم ذايع الصيت
اللي نذر نفسه فداً عن بلاده
يا محمد ابن نايف على الجدي عديت
بالطيب والأخلاق عز وسياده
سلام لك بعداد من طاف بالبيت
يا طير حر شامخ في هداده
يوم جا نداء الواجب تحزمت مابطيت
قضيت عالفتنه بليا هواده
يسلم لنا راسك هلا بك وحييت
سلامتك هي عيدنا والسعاده
يا سيدي جت لك على ما تمنيت
حزت الفخر مع وسام الرياده
أنشهد انك قلت يا الصقر وأوفيت
ونعم يابو نايف أمير وقياده
عن كل تائب بالتسامح تغاضيت
سهلت درب اللي يعود لرشاده
بينت منهجنا ولاعنهم أخفيت
عالجت الأوضاع بهدوء وركاده
فتحت صدرك ياطيب الناس وأعفيت
وفوق هذا الابتسامة زياده
بكل الثقة بالنفس يمناك مديت
أعطيتهم الأمان بعزم وإراده
شاركتهم با أفراحهم ما تخليت
سددت دين اللي عجزعن سداده
برهنت بفعولك وبينت وأبديت
أن الشهامه والوفاء فيك عاده
بأسمى الصفات الراقيه قد تحليت
وما رواه الناس اكبر شهاده
الظافر اللي يا أبيض الوجه وزيت
ما جاه ضيم وأنت عونه سناده
لكن مريض القلب مهما تهقويت
يبقى مريض مستبد بعناده
طغاة شر وشرذمة للطواغيت
قاموسهم مظلم شديد سواده
رداة حظ وفكرهم في تشاتيت
زعيمهم يعلن علينا جهاده
لأي ملة ينتمون الهلافيت
الحر ما ينوي الردى في بلاده
الخاين اللي ينقض العهد ويشيت
على بني عمه يوجه عتاده
يحلف بالإيمان الغليظة وهو يبيت
غدر وخيانه مير ويش استفاده
يا أمير تكفى حان زين التواقيت
نذر علينا النذل نخلف مراده
أبشر بنا ليمنك يالشهم ناديت
عدونا المخذول نعطب زناده
حنا رجال الدين يشهد لنا البيت
وتشهد لنا طيبه ودور العباده
نموت دونه والوطن عالي الصيت
قدره تشربناه منذ الولاده
وملوكنا غالين الحي والميت
هذي رسالتنا إلى أهل البلاده
أختامها على اشرف الخلق صليت
صلاة مؤمن وافي في وعاده
صالح بن علي آل شايع القحطاني