الشاعر والقناص المشهور بدر الحويفي ممن لهم حب وولع بالطير والقنص صور ولعه هذا في كثير من قصائده في وصف طريقة اقتناص الطير لفريسته وطرق الاهتمام بالطير ومكانته في نفسه ومراحل القنص وما يحتاجه القناص من أغراض وطريقة استخدامها اثناء الرحلة والرجال الواجب مرافقتهم وتفاهمهم مع بعض ومهمة كل شخص اثناء الرحلة وقد نقلت لي هذه القصيدة للشاعر عندما وجد طيراً عند شخص لم يعجبه طريقة تعامله ومعاملته له والتي كان لها الاثر الكبير في نفس الحويفي مما اودعه للوصف الحال والواجب اتجاه معشوقه الذي هو رفيق دربه في القنص كما وصف طرق الصيد ومواقعه لمن يرغب في الصيد وكانت قصيدة رائعة كعادته في التصوير والوصف الشعري يقول: القلب يالصاحب له ايام مزنوق ماهو منشطني من العام سوقي والرزق بالدنيا تقاسيم ووفوق نوب تكايدنا ونوب تروقي وعناية الخالق على كل مخلوق محيي الهشيم ويابسات العروقي ياللي هضمت الطير والطير مرزوق الطير رزقه بالجناح امخلوقي من يوم قل الصيد ما للولع ذوق وشعاد لو حطيت طير وسلوقي راح الولع مع دور مشعان وصفوق يوم الحباري بالمنادي افروقي ذاك الذي يطرب له البال ويشوق والطير يسوى قيمته ومعشوقي واليوم دور الطير فاشل وممحوق كثروا صقاقيره ولامن وفوقي وبعض صقاقيره يحبسه بصندوق ضايق بمنقاره يعض السبوقي لو هز راسه للفضاء وانتهض فوق ريشه دمار وبالرباط امحزوقي من عقب مضياحه على راس شاهوق اليوم ناقص واجبه والحقوقي يلعب الجاهل مع الديك مرفوق الطير مخدم والدجاجة تقوقي من شوفته كني على الوجه مصفوق صديت من عيني تذارف ارموقي حكمه بيد غيري ولابرمت منطوق هزيت راسي والضمير امحروقي من يوم جهال الوقع جالهم سوق اللي يحسبون البواشق اشروقي الطير له ناس تعرفه ومرموق اللي ولعهم بالصقاره عموقي يسوقهم حب الولع للولع سوق خص ليا قامت تلوح البروقي كان اجنبوا لمسوا مداليج ساحوق وشمال من غرب الصحن للحدوقي بأرض مراتعها تفهق بها النوق كبار الظهور مقوسات العنوقي لاهل الولع فيها مساهيج وطروق وقت الخضار وللبذيرة بهوقي العام لي معهم علاقة ومعلوق واليوم اوادعهم وقلبي يتوقي ينحاه مع درب الولع حب واخفوق وعلى الصقاره والنشاما شفوقي قلبي على شوف القرانيس مفتوق اللي طلبهن يعطينه لحوقي الي بهن ريشة مريعي وغرنوق ومن القطا فيهن نوايع رنوقي امسرولات اكعوبهن حجل واسبوق حرش الكفوف مدلجات الشدوقي وصدورهن جثلات والمتن مفهوق واقحوفهن مثل الكهوف الطبوقي والريش طلق ادقاق والبوز مذلوق والروس بيض وبالمواسي دقوقي عقد محازمهن لهن سلف واشنوق فج المناخر ضافيات الشنوقي منهن زعيم الجول ماهو بمعتوق من ضربهن كنه برمح مخشوقي دفق الحمر منهن على القاع مدفوق مثل الخناجر مزرهن للعروقي انسى سوالفهن ولا جيت اباروق يشر عليهن يالنشاما خفوقي لكن حصلي من ظروف الدهر عوق وانا عليهن يذرف الدمع موقي حل الولع يوم الولع قطف زملوق واليوم راع الطير صدره يضوقي يصبح ويمسي ضايق الصدر مخنوق تضيق من قل الهداد الخلوقي
