فلاش

اتصلت علي حرمة كبيرة بالعمر (عجيّز) وتطلب علاج ولدها وتشتكي منه .... وكان ولدها الله لايبلانا مريضاً بإدمان المخدرات .... وهي تكلمني دخل عليها ولدها .... وقالها من تكلمين ... وقفلت السماعة بسرعةه ... وبعد حوالي ربع ساعة كلمت ثاني مرة وقالت ... ياوليدي والله عقب ماقفلت السماعة انه حاط السكين على نحري يبي يذبحني .... وسألني من تكلمين ؟!! بس الله ستر وهالحين ابغى فزعتك شفله حل بهدلنا وبهدل جيرانا ومشغل الحارة كلها ...المهم دخل ولدها مستشفى الامل وتعالج ... ودارت الايام وسمعت ان ولد العجوز (مات) وقلت أتأكد من الخبر بنفسي ودورت رقمها لين لقيته ... واتصلت عليها وقلتلها ياخاله عرفتيني ... قالت إي بالله عرفتك .
قلت بنشدك عن خبر سمعته عن ولدك فلان (المريض) هو اكيد الخبر ... قالت إي والله اكيد ... منول يطلع من عندي مدري وين هو رايح ... والحين يالله لك الحمد .. ادري وين هو موجود ... بس ماقول إلا الله يرحمه ويبيحه ... ويعافي كل مسلم مبتلى بهذا المرض
ويالله سترك
الابرق