النمر صاد وصايدٍ ذا الغزاله نوبٍ يداعب وآخر الوقت قتّال

سلام لكن غير ما هو سلامي
سلام وحشٍ غارسٍ فيه نابه
نمرٍ عشاه الظبي بين أمامي
لو يده من فوق متنه وجابه
توّ النهار الوقت ماهو ظلامي
يا ويل ويلك يالمها يا عذابه
هوايشٍ تأكل وتشرب تنامي
وارزاقها من بعضها في نهابه
حمد عبدالله الوايلي - حوطة سدير
قل لي السوالف لا تطول عليّه
عطني علومٍ تسعد اللي يلاقيك
ترى الخوي يا شبل ينفع خويّه
تبي السلامه انتبه من حواليك
ربعي وربعك والخطوره قويّه
انفع رفيقك وانتبه لا يعاديك
محمد عبدالعزيز الخنيفر - أشيقر
عيني على اللي حظها صار منحوس
طاحت في يدين اللي يدور غثاها
نمرٍ مخاليبه تقل ذبحة الموس
وقوّة عضوده عالياً مستواها
يا ريم رحتي والنفس صار محبوس
مالك مفر يا رب تجبر عزاها
دنياً يعيش بها القوي رافع الروس
والا الضعيف يروح روحة أرشاها
خالد ناصر المخيمر - روضة سدير
شُوف النمر والظبي في مشهدٍ نادر
الله نزل بقلب الوحش رحماته
يشكك اللي يشوفه بالمصادر
يقول ذا النت .. هذي فبركاته
عطفه على الظبي او أعز صيداته
ما كنّه الا صغيرٍ من بناته
لكن به واحدٍ بالعرش قادر
يزرع بقلب النمر عطفه بقدراته
يا باغي الخير للخيرات بادر
وانشر وازرع بكل الكون بذراته
سعود عائش التميمي الحربي - جدة
ودّه بالغزال يتعشى
وهي تحسبه بالدلع مهتويها
جت له وهو في غابته ويتمشى
بانت لها انيابه وهي ما تبيها
أقبل عليها الموت جاها يتغشى
يفرس بنابه لين يا كل ايديها
سليمان عبدالعزيز السنيدي
النمر صاد وصايدٍ ذا الغزاله
نوبٍ يداعب وآخر الوقت قتّال
ماله أمان ودايمٍ في اجتواله
هذا النمر ما غيره أفعال تنقال
خليف المرواني
قل للمها لا يامن اللي يدهويه
يبي يتمسكن لين يقضب علا بيك
ترى العدو من كل شيٍ يسويه
أهم شي يوقعك بالشرابيك
خلّك نبيه ولا تغرّك دعاويه
يتبع طريقك لين يلقى مغابيك
علي الرشيد - رياض الخبراء
الفهد ناظر وجبته تحت نابه
من حول عنق الصيد حطيت مخلاب
هذا على ما قالوا انظام غابه
المفترس فيها على طول غلاب
والله جاعل كل شي ف نصابه
نظام للبيئة وله عدّة أسباب
محمد عبدالله الشهري - أبها
يا شبل أهلاً هلا وأهلين
لك مدّةٍ غايبن عنّي
لك موقعٍ دايمٍ بالعين
يا خوفتي منك تقهرني
اليوم أنا وأنت متراضين
ارجوك لا تخيب الظنّي
ريان محمد الخنيفر
بين النمر والريم حب وعلاقه
سبحان من يجمع على الود قلبين
يد الفهد في عنق راعي الرشاقه
مسكة مودة غايب عنه غالين
مهر التزاوج شرط تدفع سياقه
تامن بجنبك من الغدر والسراحين
من شاف ريم البر للعين شاقه
حلوة قوام ينتسب لاسمها الزين
سعود بن عبدالعزيز الهزاع - نعام
صورة العدد