الجيل الاول في سفرهم يعانون وحنّا مواترنا تجوب الفيافي

الجيل الاول في سفرهم يعانون
وحنّا مواترنا تجوب الفيافي
شفهم مع التغريز وقفوا يدفون
ودفوه بالقوه وحمل الكتافي
تكفون ليت أجيالنا لو يشوفون
نعيش في نعمه بها الأمن وافي
سليمان عبدالعزيز السنيدي - الرياض
ذا موتر ما يقوم بسلف
يا كود ربع يدفونه
عن قوته حالفٍ لك حلف
راعيك شيّبت بعيونه
لا والله اللي فقدت الولف
والنفس ما هيب مامونه
علي الرشيد - رياض الخبراء
المور غرّز وصوته بان
من يوم عشّق به الثاني
لقلق وغرّز إلى الشكمان
ويدوس بنزين ذيباني
تجمعوا قوه .. وشبّان
ماهمهم صوت رماني
شالوه بيديهم الشجعان
وراعي البشت دسماني
ابطال في فعلهم ياخوان
ذي حالهم سالف ازماني
عبدالكريم النغيمشي - لوذة
كم مرةٍ يالمور جبت المسافات
تقطع فيافي نجد سيرٍ على رمال
نقل الرياض الكد لوري وهافات
حمله ثلاثة طن خصص للاثقال
وغرّز بوادي من حمولٍ ثقيلات
يا صبرهم لو طال وقت السفر طال
سعود بن عبدالعزيز الهزاع - نعام
منظر مُؤَثِّر قصته واقعٍ فات
يحكي معاناة أهلنا وقت الأسفار
يوم السفر شابِهْ كثير الصعوبات
قطعة عذابٍ عاشها صغار وكبار
مابين تغريزٍ وعطْلِ وْمطبات
وتَضْيِيْعِ خطّ وْلافحِ الحَرّ وغْبار
ماكان بهْ دربٍ مسفلتْ ولوحات
دربٍ ترابي في ثناياه الأخطار
ناصر جمعان آل عوض - وادي الدواسر
ارضٍ غراز وموتري عزمه ضعيف
ياما من الاتعاب والفكر تعبان
وقتٍ مضى الموتر ترى دون تكييف
ربعي هلي تكفون انا اليوم حيران
وا رضٍ تقل نيران في عزّ هالصيف
حراً شديدٍ يالرفاقه والاخوان
فزعاتكم تكفون خلوا السواليف
انا اشهد ان الطيب بالرجل عنوان
محمد عبدالعزيز الخنيفر - أشيقر
كلٍ على التفسير له رمعه وباعي
هذي صفات الخلق من حكم واليها
يا حوض لو دفوك دفٍّ جماعي
تغريز فوق الجهد مالك عليها
كلٍ يدفّ وبه معاناة .. ووجاعي
مير الظروف اللي حدتهم عليها
سيارةٍ من دون دفعٍ رباعي
لو كان لك خيارْ لا تقتنيها
سعود عائش الحربي - جدة
صورة جميله وهي تذكار
خمسين عامٍ مضت وأكثر
كان السفر في صحاري كبار
وفوق الرمل ياما يتعسر
والحج له موتره تختار
وسط الغماره او الأخطر
هذي حياة أهلنا وماصار
يوم التطور بدا يظهر
صالح علي المبارك - حوطة سدير
جماعة الموتر تواصوا على الخير
يوم ان موترهم توقف مسيره
ونيت لوري في رمل غرّز عصير
وجوه النشاما فازعين سعيره
ودفوا عساه موفق يسلك السير
يقضي لزوم الي اموره عسيره
وحالاتنا اول كسيفه تجي غير
حالت شقى والعين دايم سهيره
واليوم يوم العافيه فيه تبصير
من فضل ربي كل ساعة بديره
حمد عبدالله الوايلي - حوطة سدير
اللوري مغرّز وخرباني
وأشوف ناسٍ يدفونه
موتر قديم وعطلاني
مير البلا الربع يبغونه
راعيه تعذب وطفشاني
من كثر ماهم يسبونه
يبي بداله شكل ثاني
سواق ماسك دركسونه
خليف فهيد الحربي - الرياض
دفوا الموترعساكم تسلموني
موقفي صعبٍ وبالمعنى غشيمي
ربعي ربعي افزعوا لاتتركوني
حالتي حاله وانا كني سقيمي
عادة الشجعان دايم يفزعوني
الوفا هو سلمكم سلمٍ قديمي
افزعوا يا ربعنا لاتذخروني
ذي طبيعه طيّبه والله عليمي
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق
Your browser does not support the video tag.