وحنا بكينا «رمز» يا عله بحل

الموت حق و راح يأتي على الكل
ولا فيه شخص مخلد في حياته
له ساعة يأتي على النفس ويحل
وله سكرتن يا رب نطلب ثباته
ما فيه شخص ما فقد بالزمن خل
كل بكى غاليه لحظة مماته
وحنا بكينا "رمز" يا عله بحل
كل دعاء له جنته في صلاته
فجيعة العالم ولابه تمثل
مشاعر توحدت في وفاته
في موت عبدالله بدا حزننا جل
مات الزعيم اللي حكم بحسناته
زعيم للأمه شجاع ولا يذل
رمز الشهامه صورته وذكرياته
ما غره الكرسي وحكم يجلجل
متواضع عفويته في شفاته
قلبه عطوف ولا حمل ذرة الغل
قليل تأجد بالأوادم صفاته
على ولي الكون دوم متوكل
له رؤية يشوفها هي نجاته
يالله يا موجد به النور والظل
يا خالق حب النوى في نباته
تجعل له الجنات مثواه منزل
هي منيته هي طلبته هي غناته
ونعزي انفسنا بعيون تهامل
ونعزي الأخوه والأبناء وبناته
ونبايع اللي بالرزانه تجمل
سلمان عز للوطن هو ثباته
يا خادم البيتين بالله توكل
انبايعك للحكم واحكم وصاته
عسى الله يعينك على كل محمل
ومقرن معك متنفل في صفاته
سعود عيد رشيدان الرمالي