مرحوم يانايف

القلب له يومين جا فيه دكاك
والبال له يومين ماهو سلاوي
ياعين هلي غازر الدمع من ماك
ويالقلب لوتحزن ترى منت غاوي
مرحوم يانايف عسى الخلد مثواك
مرحوم يانايف بعيد الهقاوي
أمس المشيع داخل القبر ساواك
وعساك فجنان النعيم متساوي
مافيه شك انك زعيم وفقدناك
حر ولد حر كريم نداوي
يامن بذرت الطيب من كف يمناك
عد قراح لكل ضامي رهاوي
ويامن علامات الوفا في محياك
ويامن لرد الطيب بالطيب ناوي
ويامن كثيرة ماتعدد مزاياك
ويامزبن اللي عن دياره جلاوي
يابو سعود الصدق ياشين فرقاك
سهم جرحنا جرح ماله مداوي
الشعب كله يا ابيض القلب ينعاك
مير الصبر مطلوب عند البلاوي
العاصمة من رحت وهيه تحراك
ترقب قدومك بين سارح وضاوي
ونادت عليها مكه الشيخ يفداك
شوفيه بترابي لماجد مخاوي
وعم الحزن كل الدول حتى الاتراك
زعيمهم من موتك أمسى شقاوي
والعالم الغربي دخل فيه الإرباك
ساقوا على نايف كثير النعاوي
مير الامل موجود بوجود شرواك
سلمان واحمد مسندين الشكاوي
ومحمد ابنك فيه وصفك وحلياك
وال السعود اهل الفعل والعزاوي
ويالله يامعبود يامجر الافلاك
ياغايث الدار المحيل السناوي
يامن حجيج البيت كبّر ولبّاك
نطلبك جنبنا الفتن والبلاوي
رئيس مركز القعور بمحافظة الكامل