الحرمة تسوّق ؟

المجتمع» صاير حلاله .. حرامه
وحنا نقول انه مثالي , ومرموق
نحرص على اسباب الزعل والملامه
ونقول كيف نفارق الضيق ونروق
صرنا نفكر (فالغطا) و (اللثامه)؟
ونشكخ , ونقضي يومنا لفّ فالسوق
نتبع (مفاتن) .. قبل نتبع» شهامه»
كن الجسد شهوة ماهو دم وعروق
الشخص فينا كل همه .. غرامه
كنه عشان الحب والعشق مخلوق
نحكي بذوق مع العرب .. وابتسامه
لكن مع آهلنا .. ولا نعرف الذوق
ننسى ان كل انسان فكره: مقامه
ونصنّف اهل المجتمع تحت او فوق
صار الرجل حلمه , وجلّ اهتمامه
يصبح غني لو كان من مال مسروق
نشرح سبل عيش الحياه بكرامه
وحنا الاودام عندنا ارخص من النوق
قليل .. من فكّر , بيوم القيامه
تفكيرنا كله فالاحساس .. والشوق
نبغى حقوق انسان .. لو هي علامه
وحنا مانعطي «ربنا» اية حقوق
نحكي عن الدين , وعن الاستقامه
وبيوتنا اغلبها (خيانات) وعقوق
كلٍ يبي «يملي» علينا كلامه
كن الاودام عايشه «وسط صندوق»؟
وشلون يفرض (مجتمع) احترامه
واكبر طموحاته: (متى الحرمه تسوق)؟