عرافة أوهامي !!

أصوّت ينبت الليل الطويل بها العيون البور
على بعضي خرجت وهذي أنغامي هي أنغامي
أفا..والشوف خان ومرّت قبورٍتجر قبور
يشرّدها السّكوت وصارت أعمى قاد متعامي
ذكرتك..والدّموع كتابها جوع وزمن مكسور
طعنّني سيفها وانسلْ منّي كذب هندامي
تِعِبْت أمْسح على عْمامة زماني وانْحني مجبور
لمس كفي عناقيد الجفاف وجيت لك ظامي
صحاري شرّدت عرابها ضاقتْ على عصفور
يِدوّرْ ثورة الماءفي عيونٍ غيمها زامي
وعيونك تضحك بهمي على همي ونوب تثور
وأعاف احلى مسافاتي بدونك وأرمي أقدامي
جميله مدة إيْدكْ للظلام وتحْرثين النور
على أطراف الشّحوب وكل شمسٍ صبحها دامي
ياحبي ويش اسولف لك وانا من داخلي مقهور
توارثني خطاي وملت أيامي من ايامي
وامد جروحي الثكلى على ضْفاف الحياه إعبور
تعبّرني وإلا ياخيول المهلكه نامي
عزاي إن ضاعت احلامي تجين ودمي المهدور
يسولف لك مثل ماكنت اسولف لك عن احلامي
وعزاي ان ضاعت اوراقي نثرتك للحياه سْطور
حلفت انك مزامير الجنون وزفة أقلامي
تواعدني بشفّة كاسها مع فورة التنور
وانا احيّي كفوفٍ بايعت عرافة اوهامي