صفحات المجد

يوم الوطن.. يومٍ.. بالايام كله
(ماهوب عيد) وكل هالدار تغليه
يوم الوفاء.. للفارس اللي نجله
اللي مشى دربٍ عسيره مراقيه
القايد اللي سيرته ما نمله
(عبدالعزيز) اللي لنا العدل مرسيه
للمجد صفحاتٍ فتحنا سجله
قصة شموخٍ لاجل الاجيال نرويه
من الذهب مكتوب يا سامعٍ له
تاريخنا الحاضر- أساسه بماضيه
(صقر الجزيرة) من رحل عن محله
يشيل حلمٍ في حياته مخاويه
رحل وكن القلب تصلاه مله
وجرحٍ بقلبه عارفٍ كيف يبريه
ويوم الليالي والظروف سمحن له
وبعد الظلام النور بانت مواريه
جاها وهي عذراً ومشتاقة له
عانق ثراها وبيرق العز يتليه
وهجد عدوه واستقر بمحله
وقضى عليه برميةٍ في محانيه
وحد جزيرة واستظلت بظله
ملكه على التوحيد والعدل بانيه
وبعده تولى حكمها عزوة له
عياله اللي بالحكم تقتدي فيه
أملوكنا كلٍ كسى الدار حله
وكفوفهم للعز والمجد تبنيه
وحكم (الفهد) له صفحةٍ مستقله
شيد صروح العلم عَّلا مبانيه
حتى غدت فوق النجوم المطله
دار الفخر والعز والمجد كاسيه
ورحل عن الدنيا عسى الله يحله
عساه بالفردوس يسكن عواليه
وفي حكم ابومتعب لنا الخير هله
اللي بدا بالعفو.. بيضاً أيديه
شهمٍ كريمٍ والوفاء عادةٍ له
حرٍ على الاسلام أسس مباديه
وولي عهده كل طيبٍ يدله
حكمه وفطنه صايب الرأي يعطيه
كفوفه اللي بالعطاء يشهدن له
سلطان له عدٍ يروي ظواميه
والمملكة في يومها مسفهله
بحكم المليك اللي نحبه ونغليه