أنتم ملوك الأرض وأخير حكام

يا كبر جرح المجد يا درع الإسلام
من مت يا شيخ الوفا والزعامه
طير الفجيعة في سما المملكة حام
ماهوب حدّه نجد والا تهامه
مات الفهد يوم انها جفت أقلام
والصبح من موته تزاحم ظلامه
هذا خبر موتك تناقله الاعلام
أقضّ مضجع كل حي ومنامه
اللي قعد من هول ذاك الخبر قام
واللي وقف ما عاد ندري علامه
يا هو فزع ياهو وجع ياهي آلام
يوم الحزن حدّر ونصب خيامه
قبر الفهد جعله على مرّ الأعوام
وبل مع الأيام يرهش غمامه
سلام يا قبرٍ على السنة مقام
لا فيه لا شرك ولا به عتامه
في قبرك وتسمع لهم وقع الاقدام
يوم أدبروا والكل يقري سلامه
سلام مني لك ومن كل الآنام
يا قبر وسط العود فوقه علامه
عساه في روضات جنة وإكرام
إلين رب الكون يبعث أنامه
هذا الفهد تاريخ وأمجاد وأرقام
لا قال قال وما يثني كلامه
هذا الفهد نار على روس الاعلام
نور الفلق لا شق ليل الجهامه
خادم بيوت الله من اعوام واعوام
حمى حرمها ثم علاّ مقامه
في كل دار اسلام له فضل وانعام
وفي كل بقعة أرض للفهد شامه
طبقت شرع الله عبادات واحكام
واصبحت خادم بيت ربي وامامه
ابشر بشعبٍ يذكرك طول الايام
يطلب لك الرحمة وطيب الاقامه
شفتك قبل كل عام في لبس الاحرام
ما بين بيت الله تعالى ومقامه
ترفع كفوفك للولي رب الاكرام
يحسن لك النية ويحسن ختامه
وتوحد الله يوم تشر بالابهام
توحيد عبدٍ صادق في كلامه
ومن وحّد المولى وصلى له وصام
نرجي له من الرب عفو وسلامه
واليوم بيعتنا على شرع الاسلام
للوالد القايد عقيد الشهامه
هذاك سيف الحق ماضي وقدام
اللي قبض خيل العدل من خطامه
هذاك ابو متعب وهو القايد العام
له بيعةٍ فينا وله طول هامه
حكمه بحكم الله في حل واحرام
وقوله إلى من قال جا في تمامه
شيخٍ خذا من العدل له درع وحسام
وفرض على كل الجميع احترامه
غوث الضعيف اللي توطته الاقدام
وسمّ الحقود اللي تزايد سقامه
والنايب الأول ابو كل الايتام
سلطان شيخ العز طيب وكرامه
ولي عهد وليث حربٍ ومقدام
صيته تعدى صيت أهل القرامه
ابو العطا راعي العطا شيخ الانعام
مداته اكبر من طويق وتهامه
أنتم لنا اخوان واخوال واعمام
وبوجودكم كلٍ خواله عمامه
الحكم لله ثم لرجالٍ عظام
الحكم لاهل الطيب واهل الزعامه
أنتم ملوك الارض وأخير حكام
وأخير من ولي الحكم والامامه
محمد بن راشد بن محمد آل حبشان