عز الخضوع

الشعر يعجز والقواف والأوزان
يخونني التعبير لو كنت قصّاد
وين القصيد اللي يجمّل علشان
أخلده طول الدهر فخر وأمجاد
وأعطره بالمسك وأهديه ريحان
والشعر له لحظات موتٍ وميلاد
ليت الكلام يجود لي بعض الأحيان
وأهديه نبض القلب والروح لا جاد
ليته يجملني مع نور الاعيان
(أمي الحنون) الغالية بنت الاجواد
لا يمكن اجازي عطاها والاحسان
بالعمر والا النثر والشعر وش عاد
التضحية في عمرها دوم عنوان
وش حيلة المديون والدين يزداد ؟ !
ألثم بطون أقدامها حب واذعان
وافرش لها أهدابي على الدرب سجاد
لها خضوعي عز والراس ما هان
عسى جزاها الخير من رب الأشهاد
أشرب غلاها العذب لا صرت عطشان
وحديثها يغني عن الشرب والزاد
وإذا استحى من أمه فلان . . وفلان
أقول أنا: أمي (سالمة بنت حماد)
عايض بن مساعد (مداعب الحروف)