علم لفاني

مرثية في الفريق ركن بندر بن عمر الناحل (رحمه الله) رئيس الهيئة العامة للشؤون العسكرية بالحرس الوطني
في ليلة التاسع صفر ست وعشرين
ما مثلها في كثر الأحزان ليلة
علم لفاني موجع وموجزه شين
يزلزل القاع بمواطي نزيله
من حرد مع العين ماكن بي عين
والقلب كنه فوق جمر المليله
قمت ووقعت وقلت يا ربي منين
للعبد قلب صلب واعزتيله
مصيبة يسمع صداها البعيدين
وفاة شيخ صخر المستحيله
بندر بن ناحل سليل العريبين
فقيده على الوطن والقبيله
من روس حرب ومن رجال محسوبين
وبخدمة الحكام حصل حصيله
ثقة مليكه محتضنها من سنين
وبعين عبد الله قليل مثيله
متعب وبندر عنده بحكم الأخوين
محسوب من ضمن السيوف الصقيله
كاسب رضا أهل السمو السلاطين
له منصب وكلمة وباعٍ طويله
أهل الشداد بمجلسه وأهل الدين
والعلم واهل المعرفة والفضيلة
في بيت أبو نايف أجل العناوين
للضيف والعاني رفاقه ظليله
شهم جمع من شبة العمر ثنتين
واسم تثبته الفعول الجزيله
رحب الصدر والبال والمنطق الزين
وكبده على فعل المكارم غليله
راعي فعولٍ وضح عدمه ملاويين
في ضيفه وجاره وزينة دخيله
قدامه العسرات لاهازها تلين
جاه ووجاه ومال واسم يشيله
لاحانت القالة حرم قول بعدين
بالخير يطفي شر نار الفتيلة
شهود فعله قبل الأدنين الأقصين
أحدٍ رأى بالعين واحدٍ حكي له
ينهض بأمر الله حياة الضعيفين
ما يرجي إلا دعوةٍ بالنفيله
وياكم عليه آمال تبنى لها لحين
أجناب ولا أقراب دم وفصيله
مجده شقا الراوي وعجز الدواوين
ألفاظ إشادتنا بحقه قليله
فعله كفاه وزود الخير خيرين
مجد السلف وادي تحدر مسيله
غني عن التعريف وأصدق براهين
ابن رشيد حمود من عرض قيله
يا من خبر يحذي وهو ما كسب شين
ياكود ابن ناحل وهذا سليله
مرحوم يا حافظ سلوم الميامين
مرحوم يا شيخ فجعنا رحيله
ما مات وعياله على العز باقين
اخوان نايف للحمول الثقيله
حرار لحمول الثقايل مضرين
ميرادهم هداج ماهو ثميله
يوفون لكن فجوته لازم تبين
أشوفها وأشوف بالوقت ميله
ناديته بصوتي وأنا خابره وين
وأدري لو أبقى أدعيه ما فيه حيله
لو ينشرى بالمال سقنا البلايين
ولو ينفدى الهقوات ما هي خبيله
ولو قال عزرائيل عشاي خمسين
زدناه ميه من هواة الفشيله
أقسم بأنك يا زمن راكبك دين
أخذت غالي ما يعوض بديله
لكن رضينا حكم رب الثقلين
للسنة عيون الخلايق ذليله
يا كافل أرزاق اليتامى المساكين
يا محيي الأوطان منشي المخيله
اتثبت أقواله بحضرة ملكين
وعلى امتداد الشوف قبره تطيله
وتجعل أنيسه باللحود الموازين
وتفتح لقبره باب عدن الجميله
ويجيه منها ريح طيب البساتين
تنسيه عما فات نسمه عليله
يطلب بالحاح القيامه متى تحين
يبغى جوار المصطفى مع خليله
يا خالق آدم بحكمتك من طين
عبدك أخذته وانت ربه كفيله
أرجوك لا عدى من الليل ثلثين
يا رب تفتح بابك لدعوتي له
واغفر هموم أهل القلوب المحازين
وانزل على أثر الحزن صبراً يزيله
واجبر عزا عياله أشد المصابين
والحمد على أفعالك أفضل وسيله
يالمعتلي يا الله يا رب يا معين
اجبر عزانا والحرس والقبيله