اسمع كلامي

لا تقول أنت فاهم
ترى الحياه دروس واحزان وافراح
حافظ على دينك وبالخير ساهم
خلك لفعل الخير مرشد ونصاح
احفظ صلاتك قبل موتك يداهم
طيع الولي في كل حزه وترتاح
والوالدين احرص ودور رضاهم
لا تنتظر تبر احدهم ليا طاح
وجنب عن اللي قاصرات يداهم
خويهم ما يسمعونه ليا صاح
الرفقه اللي ما تجي بالتفاهم
الا على مبدأ المصالح والارباح
لا صار عندك مال تكسب رضاهم
وان قل مالك ما لقو فيك مصلاح
الضيف ما يهنى بلقمة عشاهم
ولا للطراقي عندهم حق ومراح
دايم على الغرات تاقع خطاهم
ومن يتبع الغرات للسر فضاح
تعجز تميز مرهم من حلاهم
ينسونك الغلطات من كثر الالحاح
اقطع علاقتهم وفارق اذاهم
ترى مجالسهم على الشر فتاح
خلك مع اللي تستريح بلقاهم
لاجيتهم مهموم روحت مرتاح
ربع يشرف فعلهم من لفاهم
بيض الوجيه مزبنة كل صياح
ربي على فعل المكارم هداهم
على طريق الخير ممسا ومسراح
فكر بعقلك لا تقول انت واهم
ترى الحياه دروس واحزان وافراح