ويش ذنب الآمنين

عند زيارة صاحب السمو الملكي الأمير فيصل بن بندر بن عبدالعزيز أمير منطقة القصيم وصاحب السمو الملكي الأمير محمد بن نايف بن عبدالعزيز لأسر شهداء الواجب: نواف حمد حمود الفريدي الحربي وزميله عايض عوض العمري الحربي والتي كان لها أبلغ الأثر في تخفيف مصابنا وهو ما عهدناه من ولاة الأمر حفظهم الله فهم لنا ومعنا في السراء والضراء.
صدق الولاء طوّعت له صادق القاف
صوتي مداه ودم قلبي مداده
الشعر مع ربعي له اليوم ميقاف
أبا اعتزي به وأظهره من غماده
واختار من جزل المعاني والأوصاف
اصدق تعابير الثناء والإشاده
في مدح من ياصل صعيبات الأهداف
شيخ لنار الطيب يقدح زناده
لا هنت يا مير على أهل الوفاء طاف
يا الفيصل اللي فيك الإحسان عاده
ولا هان منهو للوطن درع وسناف
شبيه نايف بالوفاء والرياده
اللي تكفّل من قضى سنينه عجاف
ولقى اليتيم بظل عطفه سعاده
عزيتم اللي من عنا الحزن منلاف
وقلبه تقاسمتوا غلاه ووداده
يا هل المكارم والعوايد والأعراف
انتم لنا يا سادة العرب ساده
هانت مصيبتنا على فراق نواف
لأجله جمع بالموت عز وشهاده
موته شرف.. واسمه على راس مشراف
نال الشهادة دون خدمة بلاده
تزاحمت في شيله يدين وأكتاف
رمز التلاحم بين شعب وقياده
ارض الوطن صارت له فراش ولحاف
وطاهر ثراها تحت راسه وساده
هذا الولاء يسمع ويقرأ وينشاف
وحنا بدايات الولاء وامتداده
حنا ولانا صدق وأسلافنا أسلاف
نمشي على خطاهم بعزم وجلاده
اللي لهم في نجد مشتى ومصياف
يوم التطاحن والشقاء القراده
يوم الزمان اللي مثل زادهم حاف
وقت تخالط مع بياضه سواده
وأشرق بشيخ ما توانى ولا خاف
رفع من المصمك لبيرق جهاده
ساروا معه بسيوف وقلوب نظاف
يومه تعلاّ فوق صهوة جواده
يا ما سرن فيهم سريعات وخفاف
تحت لواء شيخ بعيد مراده
بالسيف والتوحيد وحّد للأطراف
ثبّت لحكمه واستوى في شداده
ورفع شعار العدل.. ميزان الانصاف
وللمملكة كوّن مسار وسيادة
واللي مذاهبهم ضلالات وإرجاف
مذهب خوارج حان موسم حصاده
والخائن اللي لأرضنا الطاهرة عاف
يموت صاغر ما هتنا في رقاده
صفّق معه زمرة كراعين وأظلاف
خان لشرف داره وملحه وزاده
واصدق ولاء في موت عايض ونواف
طاعة مليك وموت عز وشهاده