الله يديم الدّار بأحلى صورها

حنّا السعوديين روس للاقطار
الخير فينا والديار انعمرها
حنّا السعوديين حنّا هل الدّار
ان حلّ يوم وانتثر به حمرها
حنّا السعوديين لو صار ما صار
حنّا المراجل ساسنا وانخبرها
حنّا أهل التوحيد من ماض الأدوار
والطيب طبع اشعبونا ما عسرها
حنّا دعاة السّلم من عهد الابرار
وسنّة نبي الله نمشي باثرها
واللي حصل ما هو بمقياس واعيار
شلّة خراب الله خذلها ودمرها
شلّة جهالا جرّها اليوم تيار
شلّة جهالا الله لعنها وثبرها
والله فلا يُعقل عملكم يا الاشرار
خراب مع قتل النساء في احجرها
وش ذنب طفل غافل ما بعد سار؟
آمن مع امه تقتله في نحرها
وش ذنب حور يا نعة مثل الازهار؟
قتّلتها وهي نايمة في سررها
وش ذنب شيخ عابد سر واجهار؟
وش ذنب بلادك يوم تسعى لضررها؟
وش ذنب مستأمن دعيناه للدار؟
يسعى يدور الرّزق وارضه هجرها
وش ذنب رجل الأمن وش ذنب الاحرار؟
اللي على أمن الدار دايم سهرها
ارجع لرشدك كان تسمع للاشوار
واحفظ لنفسك حقها لا تحقرها
والله فتح لك باب توبة وتختار
دروب السنع تدلّها واتخبرها
الله اكبر كيف ببلادنا صار
غريب ما هو عادة في بشرها
يا الله ردّ الكيد لنحور الاشرار
واخذل أعداء الدّين وابطل دُورها
قولوا معي آمين في وقت الاسحار
الله يديم الدّار باحلى صورها