ورقة قديمة

لاشفت راعي الدين فزيت مرتاع
حيث ان راع الدين ماهوب ممنوع
يا الله يامن هو لداعيه سماع
واللي دعا غيره فلاهو بمسموع
افرج لمن وجهه غدا فيه لماع
من كثر دكات الهواجيس مرموع
يا غرس يا اللي بالفضا كنه اقطاع
مثل الجهام اللي على العد مقروع
خمس قوانينه علينا لها اتباع
شرع لنا ماهوب توه بمبدوع
لامن دخله الجار ماهوب يرتاع
وبناه ماهو دون الادنين مرفوع
والثانيه لاجو هل الهجن خراع
يشكون اهلها لاهب القيظ والجوع
نبدي لها الترحيب مامست القاع
ما نيب من كنه عن الضيف مقموع
والثالثه ندي قنا كل مسراع
مانيب صعب مير قدني لها طوع
والرابعه زاد بها السمن منداع
ومره معه كبش من الضان مفدوع
والخامسه خصة رفيق لنا جاع
يلقى بنا في غبر الايام منفوع
يا اللي تسوم الغرس ما نيب بياع
ياما اهبلك يا اللي تسومه بمقطوع
اطريت بيعه باغي به تمناع
من واحد دينه من العام مدفوع
نشري الثنى من مال بياعة الصاع
كم ليلة نشبع وهو طاوي جوع
وان بعت انا غرسي فلانيب بتاع
ياويش اسوي منه ليا رحت مقلوع
مانيب لاعامل ولانيب زراع
ولانيب سراح له الشرط مدفوع