محاورة الأسبوع

هذه المحاورة جرت بين الشاعرين
سعيد مسعد السليمي وحمدان عتيق المخلفي
سعيد:
سلامات يا حمدان ما باس ما باس
سلامات ياللي نايشك سم دابي
لعلك تعيش ودايماً رافع الراس
ويفداك من قلبه سواد الغرابي
حمدان:
اكتبه الولي يا صاحبي جوف قرطاس
واظنك تعرفه يا عزيز الجنابي
لكن احذر الايام والوقت حساس
وردنا العدود ولا وردنا السرابي
سعيد:
ترى العلم يقسم بين عنتر وجساس
وابفهم جوابك وانت تفهم جوابي
تصنع صناعة مثل عباس فرناس
ولكن سيوفه ما مسكها النصابي
حمدان:
اظنه لفا بالعلم يالشيخ عساس
وحنا قرينا اللي بنص الكتابي
اخذنا بها يالذيب تسعين مرواس
تنشد بها الشيبان ويالشبابي
سعيد:
وانا خابرك بالبحر سباح غطاس
وطاب الفرح بوجودك اليوم طابي
ترى العلم يعرف يوم تهرج به الناس
وسنك صغير وشايف الراس شابي
حمدان:
وانا داري انك رجل مانته ببلاس
بعدما عرفته لا تقطع خطابي
ترى الناس يا سعيد تولع بمجباس
ولا ولعت تاكل جديد الثيابي