فقيدنا من ماثله بالفقايد

قصيدة في رثاء العم محمد بن حمد الغزي رحمه الله:
ياناعي بالصوت راح الفقيده
نسل الشيوخ مجددين العوايد
بالعون هوّد ما هرجت الوكيده
فقيدنا من ماثله بالفقايد
اوي عمي يوم الايام بيده
مقباسها بالمظلمات الشدايد
اوي عمي من وفى بالوعيده
عقبك قليل من يوف الوعايد
اوي عمي للمراجل عميده
ما زحزحته الجايرات اللدايد
اوي عمي ليثها بالشديده
وقت العزاوي نافل الفعل زايد
اوي عمي كايداللي يكيده
مفراص نادوس الخطر والزنايد
اوي عمي بادع الجود سيده
ياطا علابي الجود لاهل المدايد
اوي عمي ما مشى للنقيده
رجله مجنبها دروب النقايد
اوي عمي يا ملا من يعيده
ركايبه قفت ولا هو بعايد
ياليت عمري في يديه وازيده
نصف العمر لكن مافيه فايد
ياليت ياليت المناوي تفيده
غير الدعا ما للمناوي فوايد
يا الله طلبتك يا رحيم بعبيده
انت الذي ترجى ولا عنك حايد
يا الله تثبت حجته والعقيده
عند السوال وكشف دق الزهايد
يا الله عسى قبره جنان فريده
يا الله عسى تسقيه وبل الرعايد
يا الله عسى بمقابلك يوم عيده
مع الصحابه بالجنان الخلايد
قلته وحالي عاد مثل الجريده
لا عدت يا علم ظهر بالجرايد
والقلب يكفخ كالهزيل المعيده
يا مهتني بالنوم كيف الوسايد؟
صيّور يابن آدم لجثه هميده
متوسد كوم اللبن باللحايد
يبيد عمرك والليالي تبيده
زود الليالي والعمر كالضدايد
اللي عملت اليوم سجل بقيده
مضبوط عن نقص الخطا والزوايد
اليوم تذهل مرضع عن وليده
يوم العرق مقياس لاهل الفسايد
يوم تنعم به وجيه سعيده
واهل المعاصي كبلوا بالحدايد
نريد والله يفعل اللي يريده
سبحان ربي للمكيدين كايد
واختامها ازكى صلاة جديده
على شفيع الناس يوم الشهايد
واختم كلامي بالبدايه واعيده
فقيدنا من ماثله بالفقايد