نار الطعون

تمر سنين وانفاس الزمان العذب تدعيني
وخيل الشوق تركض بي على ربعي على ناسي
دخيل الله يابنت الغرام العف يكفيني
...... قضى صبري.. مضى عمري.. كبر همي.. سطى ياسي
دخيلك وينها ذيك الدروب اللي توديني
..... واشوفك قبل ياخذني الزمان الليّن القاسي
حرام اسكت على نار الطعون الزرق ياعيني
..... واضم الجمر في كفي واذوق المر في كاسي
امانة كان لي عندك غلاة وقدر حنيني
.... يكفيني عنا نفسي وشقى عيني ووجع راسي
وامانة كان في قلبك مثل يابنت مافيني
....... تعالي قبل يطويني الوداع ويخنق انفاسي
تعالي نقتل الفرقا وتضم ايدينك ايديني
........ وابشر باللقا جرحي القديم وطير هوجاسي
متى يافدوة الحظ الضرير وفدوة سنيني
.... يخيب احساس صكات الزمان ويصدق احساسي
اذا كاني خسرتك وانتهى مابينك وبيني
..... ابرحل واصفق بكفي النحيلة واعلن افلاسي
الاياحظي اللي من زمانٍ طاف يبكيني
...... تراني ياولد عمّ الشقى مانيب متناسي
حسبتك يوم انا غافل عصاي اللي تقديني
.... لقيتك يا الله الخيرة عنيدٍ جافلٍ قاسي
والى هاالحد يابنت الغرام الذّرب يكفيني
...... أمانة حددي دربي الجديد وداوي اتعاسي
وتمر سنين وانفاس الزمان العذب تدعيني
...... وخيل الشوق تركض بي على ربعي على ناسي