حلول اللغز

نشرنا في عدد الأسبوع الماضي لغزاً كان حله هو «اللغز» نفسه وقد كانت الحلول الصحيحة الآتي:
العيد حل والكل عايد أهاليه
ياالله عسى أعيادكم مستديمه
الحل هو اللغز بانت معانيه
هذي حلول اللغز ماني غشيمه
أمجاد الشكره
الفكر حار والقلب كثرت طواريه
هواجسي كثرت عليه مديمه
اللغز هو الحل هذي مواريه
يا أهل الوفاء يا صدقين العزيمه
معجب مطلق الشكره
أهلا هلا باللغز واللي بدع فيه
في صفحةٍ من الشوايب سليمه
القبر لغز وحله اللي دفن فيه
وحَفره ودفنه بالعقول الفهيمه
سليمان مخلف الشمري
محير الترمس
عد البشر وعداد فرض نصليه
يا مرحبا ياهل الوجيه الحشيمه
ويااللي كتبت اللغز بانت مواريه
حيث ان وسط تراث «للغز» قيمه
عطاالله بن سليمان العطاالله
الزلفي
يا أبوسعود اللغز نعرف مواريه
وانت الحكيم اللي هجوسك حكيمه
اللغز حله لغزك اللي مسويه
عساك سالم والعواقب سليمه
عبدالهادي فهاد العرجاني
الأفلاج النايفية
لاهل التراث ارسل سلامي واثنِّيه
عندي لهم قدر وحشمه وشيمه
أحد يقول اللغز ما نيب لاقيه
«واللغز» هو حله بصدق أو عزيمه
علي رشيد الرشيد
رياض الخبراء
اللغز حله كل عين تراعيه
في صفحة ياعلها مستديمه
والقبر هو اللغز والحل راعيه
ولا يظهره ياكود ناس فهيمه
محمد بن عبدالكريم الشايع
بريدة
ساعة قريت اللغز بانت خوافيه
وارسل جواب اللغز وأنا برحيمه
اللغز «حل اللغز» سهله معانيه
تبينت لي بالبيوت الحكيمه
فايز بن حماد سعود الشمري
رحيمة
الى رمعت اللغز حذراك تخطيه
خلِّك قوي إصرار عندك عزيمه
اللغز هو «اللغز» بانت مواريه
هذا جوابي والحلول السليمة
راشد بن ناصر الشقيق
الأسياح
يا مرحبا بلغز جزال معانيه
وصفحة تراث للجزيرة تقيمه
ويامرحبا تهدى بطيب يباريه
والقبر فيه اللغز والله عليمه
محمد حمد الودعاني
محافظة السليل
سلمان لو نرفع لك الصوت توحيه
والجار لِه حق عسى الله يديمه
اللغز حل اللغز كان أنت مغديه
لجْل القوافي صرت مثلك نديمه
فهد بن عقيل الطويان
بريدة
لو كان راع للغز حاول يخفيه
لابد تلقاه العقول السليمه
للغز واضح بينات مواريه
عليه من نفسه لقينا وسيمه
عايد بن نوار العنزي
الرياض
سميت بالرحمن ربي وأنا ارجيه
نعوذ به من الذنوب العظيمة
واللغز بين واضحات معانيه
واللغز واضح بالقلوب الفهيمة
خالد بن سالم الهوته
الرياض
عيدك مبارك والسلام ابتدي فيه
وأزكى تحية للقلوب السليمة
ترى جواب اللغز لغز نسميه
ولا تعرفه غير الرجال الفهيمه
هندي نابت الغياثات
الأفلاج
«اللغز» تكشف مفرداته معانيه
قانون عند أهل العقول السليمة
وكل على ما قيل فكره يقديه
وآدم فهيم وجات حواء فهيمه
صويلح بن عبيسان الشيباني
الرياض
حل الفرح والعيد حلت لياليه
الله على مهد الرسالة يديمه
بالخير والأمجاد في ظل حاميه
يبقى.. وأقول اللغز ذعذع نسيمه
فهد الجروان
الزلفي
اللغز يبكي حاضره مجد ماضيه
والا النوايا يا النشاما سليمة
لولا الجزيرة كان ضاعت مواريه
بجهودكم ياهل العقول الحكيمة
محمد عبدالكريم الغزي
الزلفي
اليوم عيد وكلن اليوم نهديه
أزكى التهاني للرجال الحشيمه
اللغز حل اللغز وبانت معانيه
ويا تراثنا هذي الحلول السليمة
محمد بن عبدالعزيز الخنيفر