حلول اللغز

نشرنا في عدد الاسبوع الماضي لغزاً كتبه الشاعر فهد الجروان من محافظة الزلفي.. وكان نصه:
خبروني عن فتاة بيننا ما هي مقيمه
شارده والها مع الايام حلٍ وارتحالي
دايم تاتي عقب بنت لها فضل وحشيمه
اكلها جايز.. ولكن بيعها ما هو حلالي
وقد وردتنا عشرات الحلول.. اكتمل منها من حيث صحة الحل وسلامة الوزن والالتزام بمجريات اللغز وقافيته الحلول التالية:
اليمين اللي كتبت اللغز بامر الله سليمه
والجزيرة عزها الله تحفظ تراث الرجالي
الفتاة هي الضحية وان قيمتها عظيمة
عقب يوم الوقفه اللي لجلها شد الرحالي
مسعف ناهس العتيبي
منجم مهد الذهب
يا بريدي لا توقف هاك مرسالي حشيمه
بلغ الشاعر سلامي واهد له ورد زها لي
واذا حج البيت قل له للهدي ياخذ سليمه
ياخذه لو زاد سعره ياخذه لو كان غالي
نايف محمد الاسيد
القريات
الجزيرة لغزها مليان وبيوته سليمه
ودي اشارك بحله يوم جابوا له مجالي
يا فهد نحر «الضحية» يا فهد سنة عظيمة
اخذ حل اللغز واضح دون شك ولا جدالي
سالم مقبل الغرابي
القيصومة
شارده مما تشوف من الرجاجيل الكريمة
الكرام اللي تهلي بالضيوف وكل غالي
الضحية والوقوف بعرفه سنة عظيمة
عشر ذي الحجة فضيلة مثلها العشر التوالي
محمد علي السالمي
رفحاء
مرسلين الحل يمك في بيوت مستقيمة
دوك حله بالجزيرة يوم انا حله طرالي
لا تهاون بالضحية دور الشاة السليمة
والضحية يا صديقي ما تباع بكل حالي
سعد مويزر البدراني
الرس
نحمد الله بالبداية والتحية مستديمة
للتراث وللجماعة كل ما حل المجالي
من يريد الخير ينقا من ضحاياه السليمة
في نهار العيد والا في ثلاث له توالي
علي رشيد الرشيد
رياض الخبراء
يا فهد لغزك عرفته بالبيوت المستقيمة
والاجابة خوذها من بعد ما اعلنت السؤالي
وحكمة الألغاز يالجروان بعقول سليمة
اضحية والاضحية سنة وسنتنا عدالي
نمر بن سعيد الحربي
القصيم - ذوقان
الفتاة اللي نشد عنها معد اللغز اقول انها بهيمة
الضحية هي جواب اللغز يا راعي السوالي
سنة تلزم على المسلم فوائدها عظيمة
في نهار الحشر يوم وصفه يفوق الخيالي
محمد هذال البريك
الضحية يا فهد في ديننا قدر وقيمة
من وجد له قدرة ضحى لنفسه والعيالي
من كرم ربي علينا يوم سخر هالبهيمة
ما ينال الله منها الا التقوى وامتثالي
الرس -فهد الحزاب
مرحبا بالشاعر اللي نيته دايم سليمه
يوم بتراث الجزيرة جاب له لغز خيالي
يا فهد ترى «الضحية» من شعايرنا العظيمة
نطلب الله يوم نسفك دمها خير النوالي
عطا الله بن سليمان العطا الله
الزلفي
مرحبا ترحيب صادق نيتي نيه سليمه
بالرجال اللي تحط البن في وسط الدلالي
كان ظني ما يخيب الحل للبنت الوسيمة
الاضاحي حلها ما فيه شك ولا جدالي
جهاد المطيري
لغز بن جروان شفته له معانيه العظيمة
حجة الاسلام ركن وثابتة مابه جدالي
والضحية هاتها وشروطها تاتي سليمة
واشتر الغالي ترى اللي تذكره بالحيل غالي
سعد بن صنهات السهلي
الدرعية
لغز ابن جروان له بالشعر ماجوب وقيمه
مفردات كنهن صوغ الذهب والطرق حالي
كان حل اللغز حول العيد بايام الوليمه
الضحية هي فتاة الحل قبل ارسل مقالي
خليف الحربي
الرياض
غردي فوق الغصون المايلة والمستقيمة
يا عصافير الفرح والمسك من عرق الغزالي
عشت ياكف الوفاء حصلتها حشمة وشيمة
يا صباح العيد والليلة تراها احلى الليالي
عطرها فواح والمزنة لها كفوف كريمة
والضحايا ثلثها نجدي وثلثين استرالي
محمد عبدالكريم الغزي
الزلفي
يا فهد لغزك وصلنا في بيوت مستقيمة
وابشر ابحله نحله يا فهد يابن الرجالي
الفجر نعرف صلاته واجبه لله عظيمة
ما توخر لين تظهر شمسنا فوق العلالي
حجي بن سليمان الحجي
الأحساء
ابن جروان عسفها ثم قلدها الشكيمة
والحميدي ذبها من يمه الحد الشمالي
يا فتاة ذبحها بين الملا ماهو جريمة
الضحية هي مراسي العلم ما فيها جدالي
ماجد الغزي
الزلفي
راكب اللي لا همزته يافهد تسمع رزيمه
سايقه ممتاز فكره ضايق والجو خالي
ما يهمه للشتا بالبرد مع عجه وغيمه
لازم بعيد «الضحية» يلتقي باغلى الغوالي
زايد ونيس العماوي الحازمي
طريف
التميز بالجزيرة يا عسى ربي يديمه
هي جريدتنا الحبيبه قدرها بالقلب غالي
بعد هذا لغز ابو سلطان يقصد به بهيمه
تذبح بعيد «الضحية» ذا جوابي للسؤالي
عبدالله بن حمد البدر
الزلفي
يا فهد جتك الحلول اللي بتاخذها سليمه
مع تحياتي تصلكم واضحة يابن الرجالي
الضحية من يضحي ياجد خيور عظيمة
وانتبه لشروطها اللي وافيه واخذ الجزالي
محمد بن عبدالعزيز الخنيفر
اشيقر
لغز وارد من فهد محكوم بالفاظ حكيمة
ومن وضوحه ما يبي له لانقاش ولا جدالي
وجبت من عندي جواب للسؤال بدون قيمة
يا محرر فالجريدة وصله راعي السؤالي
للفتاة شروط واهم الشروط انها سليمة
ما يصير بها عيوب اولا تصير من الهزالي
خالد ذعار العاطفي
الرياض
يابن جروان استلم حل صحيح وفيه قيمة
من فطين مره اللغز وتبين فالخيالي
والضحية بالوصايف لازم تاتي سليمة
ومن نوى يذبح ضحية يشتري خير الحلالي
مبارك محمد شويل
الرياض
مرحبا عد مالاح براق الحيا وانهل ديمه
وعد مانبت الورق بالغصن عقب السيل سالي
ولغز ابن جروان واضح للرجال اللي فهيمه
صوموا الوقفه وضحوا ياكريمين السبالي
مانع رهيدل الحربي
الخرج
مرحبا يالشاعر اللي جامع صدق وقيمة
يا هلابك ياعديم الجنس يا واف الخصالي
وحل لغزك يا عميل الخير من قرب بهيمة
في نهار العيد ساق ضحيته يبغى المعالي
محمد بن حمد البدر
الزلفي
الفتاة اللي ذكرته يا فهد راع العزيمة
الضحية والضحية بيعها ما هو حلالي
دايم تاتي عقب بنت لها فضل وقيمة
وقفة الحجاج فيها يغفر ذنوب جلالي
عبدالعزيز الحمد القاضي
عنيزة
نسنس الغربى وذكر مولع الخافق نديمه
واعذاب القلب كانه ذعذعت ريح الشمالي
«الضحية» حل لغزك يا فهد تشمل بهيمة
خذ جواب كاتبينه مثل نقاد الريالي
مشاري خالد الدعجاني
شقراء
الفتاة اللي ذكرتم يا فهد ما هي عديمه
ماشيه في وقتها والها طلوع ثم زوالي
من فعلها كاسب للخير والطرقه سليمه
الضحية سنها شفيعنا يرم السؤالي