حلول اللغز

نشرنا في عدد الاسبوع الماضي لغزا كتبه الشاعر: حجب بن ردن العصيمي نصه:
أناأباأنشدك عن طارش يجي الانثى مع الرجال
بعد خمسين يا القاري يحل الضيف بخيامه
تراه مكرم عند العرب غالي وله منزال
وبعض الناس يتعبهم الى من حلت ايامه
وكان حله (الشيب) وقد توصل الى الحل عدد كبير من القراء وبعضهم استبعدت حلولهم رغم صحتها لأنها لم تلتزم ب(البحر) أو (الطرق) وكانت الحلول المكتملة كما يلي:
وكم من واحد طارشك في راسه بدا له حال
وبعد الطير الاسود فيها الابيض ثبرت اقدامه
بعد ما كان غايب حل في حرمه ورجال
ومن يكرم كثير الشيب يلقى الخير قدامه
سعد الكثيري
الحريق
**************
رغم اني صغير السن,, ولكن ما بها اشكال
عرفت الحل عن لغزك,, وواجب عندي اكرامه
هذاك الشيب يا عصيمي بلاشك ودون جدال
واحيي كل من يقرا ,, عدد ما خطت اقلامه
محمد رغيان الشمري
حائل حي العزيزية
**************
لفاني الطارش المذكور,, لو توي صغير الحال
ومنه اهتلت يوم انه ركز بالراس مرسامه
لبس طاقية وغترة,, تلطم به بدون عقال
وثوب أبيض,, عرفت انه هذاك الشيب وأوقامه
خالد بطي الخمعلي
القصيم
**************
على مركى الوفا والمرجله تستاهل الفنجال
ليا دارت فناجيل المعرفة جتك قدامه
نشوف الوقت قاسي من غثاه يشيب العقال
ولو يضحك زمان الادمي ما حقق احلامه
محمد عبدالكريم الغزي
الزلفي
**************
هلا يا مرحبا عداد ما هل المطر همال
برجل صاغ لغز وارد يستاهل وسامه
وقار (الشيب) يا ابن ردن للشايب وفيه اجلال
وكم من شايب لازاد شيبه زادوا اكرامه
منيف مقبل الغرابي
النبقية
**************
بديت بباسط البيدا وثبت به رواسي جبال
لاجل ماتميد بالمخلوق وسر الغيب علامه
من ابن ونيس نرسل حل لغز للجزيرة شال
هذاك الشيب للمؤمن وقار وبين أوسامه
زايد بن ونيس الحازمي
طريف
**************
على شاطي ربيع العمر,, أنا لي بالحياة آمال
تداعبني واداعبها,, وصبري يعزف انغامه
عسى وقت الشقا يضحك,,ويسعفني بطيب الفال
قبل (شيبي) يلوح,, وخافقي تتبدد أحلامه
فهد الجروان
الزلفي
**************
أنا بابدع جديد القاف وكل دار لها مدخال
ترى عمر الفتى يمضي لياليها مع ايامه
أشوف (الشيب) كاثر في شباب نصفهم جهال
يزهد بالفتى خله بعد ما كان سوامه
مشاري خالد الدعجاني
شقراء
**************
شباب راح وشيب حل بالتقدير والاجلال
ليا شفته على اللحية وبالشارب وبالهامه
الى منه نزل بالشخص ما يرحل ولا ينشال
توطن في مواقع ربعه اللي كان قدامه
محمد علي السالمي
رفحاء
**************
حجب ضيفك وصلني له ثلاث سنين يا رجال
أنا وياه في حرب ضروس دوم صرامه
وركز له خيام فوق راسي صعبه المنوال
بياض الشعر بالصابر برز في منبت الهامه
عبدالله بن عبدالعزيز الفهد
الزلفي
**************
جواب اللغز واضح يا حجب ماظن فيه جدال
يقولون (الكبر) دايم يبين الشيب قدامه
عسى الله ما يخيب من يقوم بصالح الأعمال
يعوضه بالعفو والمغفرة ويمتع ايامه
صويلح بن عبيسان الشيباني
الرياض
**************
سلام الله على اللي يبدع الالغاز والامثال
حجب ردن العصيمي مكرم الشايب على الهامه
صنوف الصبغ يشريها كثير الشيب يارجال
لعله ياخذ العذراء ولو هو بآخر ايامه
حجي بن سليمان الحجي
**************
هلا يا مرحبا يا كاتبين اللغز يا الابطال
عدد ما طب سوق العرف بياعه وسوامه
بعدها يا العصيمي جاك حل اللغز بالامثال
ترى شيبك يجي بالدقن والاشناب والهامه
زيد بن جريد بن سعدا
بريدة
**************
هلا بك يا العصيمي مرحبابك قلت كيف الحال
عدد من حج بيت الله وصلى والشهر صامه
ترى عمر الفتى لابد ما ينفذ بعد لو طال
مضى وقت الشباب وحان وقت الشيب جا زامه
سعد صنهات السهلي
الدرعية
**************
الا يا مرحبا حييت يا اللي تنظم الامثال
وابرسل لك جواب اللغز عبر الفكس وازحامه
وكان الشيب طالع بي ترى من كثرة الاهوال
وكل لو كبر عمره يبى يلقاه قدامه
محمد معتق بن صخيبر الحربي
عنيزة
**************
اشوف ارجال بالخمسين ماشا الله تقول عيال
ليا قابلتهم تقول ابو عشرين باوقامه
لكن (الشيب) يفضحهم بقوع شعورهم لا طال
وعند أقل جهد تشوف كل يهمز عظامه
سالم مقبل الغرابي
القيصومة
**************
جواب اللغز لتراث الجزيرة نرسله بالحال
بصفحات الجزيرة ياصلك لو كنت بتهامة
يلوح الشيب يا ابن ردن بالخمسين والاجيال
وهو ضيف عزيز ومنزله بالوجه والهامه
نادر مسفر الحويماني
البجادية
**************
بديت بذكر من نزل مبارك وانزل الانفال
بعدها قلت حلٍ يا العصيمي صادت اسهامه
تراه الشيب معروف وله قدر مع الاجيال
يبين في البشر لا من ظهر واكتملت أعوامه
عبدالله صويان محمد الصخابرة
الأفلاح البديع
**************
عرفت اللغز يا الغالي وحله ياصلك بالحال
يقوله من قرا ابياته وشاف الحل قدامه
أقول الشيب هو حله ولا عندي عليه اشكال
الى شفته ظهر فاعرف شبابك راحت ايامه
صالح عبدالله الزرير التميمي
الرس
**************
سلام الله عليكم يا حجب واقول كيف الحال
عدد من طاف بالكعبة بشهر الحج وصيامه
وانا بقول حل اللغز واضح يا وسيع البال
تشوف (الشيب) في شعرك بوسط الخد والهامه
علي رشيد الرشيد
رياض الخبراء
**************
صحيح الكبر شين ويتعب الحرمه مع الرجال
مصير اللي عطاه الله عمر يلقاه قدامه
كبير السن له بالقلب قدر وقيمه ومنزال
ولابه عيب لو (شيبه) كسى العارض مع الهامه
محمد مرشد التميمي
حائل
**************
هلا بالشاعر اللي يوفي المعنى ليا من قال
عسى عمره طويل ومتع الله جملة أيامه
ترى حل اللغز سهل على اللي يفهم الامثال
هذاك (الشيب) يتعب من غزاه ويثني القامه
حبيب مزعل الطواله
حائل العش
**************
هلا بك يا حجب واظن شعري ما يبي موال
ترى الطارش بدا فيني وانا في مبتدا ايامه
هذاك (الشيب) يا الشاعر وخذ الحروة من المرسال
ولكم مني تحيات من الشملي الى تهامه
محمد عائد النعام
الشملي
**************
أظن اللغز ما يقدر حجب يحجبه مهما قال
ولو عنا يحاول حجب شيب الراس بعمامه
احسبه يوم قال اللغز ما بين خفايا الحال
لكنه صار مثل اللي ترك لي بصمة ابهامه
إبراهيم شفاقة العتيبي
القصيم
**************
هويت الشعر من صغري واعده مثل راس المال
ولي قانون في نظمه لأني عارف انظامه
طلوع الشيب يعطيني عبر يا صاحبي وامثال
غزاني الشيب في راسي وجسمي ضعفت اعضامه
طالب حسن باتيس النعماني
حضر موت اليمن
**************
هلا بك يا العصيمي ياعساك بخير واطيب حال
هلا بك عد من طب الحرم يطاف بحرامه
قرينا اللغز والمعنى حقيقه ما عليه اشكال
تشوف,, الشيب,,بالمخلوق مهما طالت ايامه
زهران عون الله المطيري
بريدة
**************
نشدتني عن طارش يجي الانثى مع الرجال
ونسيت انه يجي بدري وقد تتأخر ايامه
هذاك الشيب يا صاحي وهو للآخره مرسال
وكل الناس تخضع له وتستسلم لاحكامه
عابد إبراهيم العابد